சுவிஸில் பழைய தேவாலய மணிகளின் வரலாற்றைப் பாதுகாக்கும் ஒரு சங்கம் இந்த ஆண்டு தனது 35வது ஆண்டு விழாவைக் கொண்டாடுகிறது. வாலே மாநிலம் (Valais) உட்பட பல இடங்களில் நிகழ்ச்சிகள் நடக்கின்றன.
முன்பு மணி ஓசைதான் ஊருக்கான செய்தி. குழந்தை பிறந்தால் மணி அடிப்பார்கள். யாராவது இறந்தாலும் அடிப்பார்கள். ஆபத்து வந்தால் மக்களை எச்சரிக்கவும் மணியைத்தான் பயன்படுத்தினார்கள்.
மார்ட்டினி (Martigny) நகரில் கிறிஸ்டோஃப் பர்கெஸ் (Christoph Burgess) தன் நண்பர்களுடன் சேர்ந்து ஒரு பழைய தேவாலயத்தின் மணி அமைப்பை மீட்டெடுத்தார். மரம், உலோகம், கயிறு என எல்லாம் மணிக் கோபுரத்தின் உச்சியில் இருக்கின்றன. கடைசியாக மணி அடித்தவர் சுமார் 40 ஆண்டுகளுக்கு முன் இறந்துவிட்டார். அதன் பிறகு இந்த அமைப்பு அழிந்துபோகும் நிலையில் இருந்தது. மணியை எப்படி அடிப்பார்கள், என்ன இசை வாசிப்பார்கள் என்பதையும் அவர்கள் மீண்டும் கண்டுபிடித்தனர்.
டிசினோ (Ticino) பகுதியைச் சேர்ந்த ரோமியோ டெல்’எரா (Romeo Dell’Era) மணிகளில் எழுதப்பட்டுள்ள வாசகங்களை ஆராய்கிறார். சிறுவயதில் தன் கிராமத்து மணிகளை அடிக்கத் தொடங்கியவர் அவர். பிறகு டிசினோவில் உள்ள மணிகளை எல்லாம் பட்டியலிட்டார். மணியின் வாசகம், அதன் வடிவம், அதைத் தாங்கும் கட்டமைப்பு ஆகியவற்றைப் பார்த்தால் அந்தக் கோபுரத்தின் வரலாறு தெரியும் என்கிறார்.
இந்தச் சங்கம் 1991-ல், சுவிஸ் நாட்டின் 700வது ஆண்டு விழாவின்போது தொடங்கப்பட்டது. மணிகளில் ஆர்வம் உள்ள சிலரை ஒன்றாகச் சேர்ப்பதே நோக்கம். இன்று 84 உறுப்பினர்கள் இருக்கிறார்கள். எல்லா மொழிப் பகுதிகளிலிருந்தும், அண்டை நாடுகளிலிருந்தும் வந்தவர்கள் இதில் உள்ளனர். மணிகள் ஊர் மக்களின் வாழ்வின் முக்கிய அங்கம் என்பதால், அவற்றின் நினைவைக் காக்க வேண்டும் என்று அவர்கள் சொல்கிறார்கள்.
மூலம்: RSI
புகைப்படம்: Nick Fewings / Unsplash





