கொங்கோ ஜனநாயகக் குடியரசில் பரவி வரும் எபோலா வைரஸ் தொற்றினால் பாதிக்கப்பட்டவர்களின் எண்ணிக்கை 11 ஆயிரத்தைக் கடந்துள்ளதாக அந்நாட்டு அரசாங்கம் தெரிவித்துள்ளது.
அந்நாட்டில் இதுவரை ஏற்பட்டுள்ள மிக மோசமான எபோலா தொற்றுப் பரவலாகக் கருதப்படும் இந்தச் சம்பவத்தில், 11,042 பேர் வைரஸ் தொற்றுக்கு உள்ளாகியுள்ளதுடன், அவர்களில் 5,387 பேர் உயிரிழந்துள்ளதாக சுகாதார அமைச்சின் சமீபத்திய புள்ளிவிவரங்கள் தெரிவிக்கின்றன. இது தொற்றுக்குள்ளானவர்களில் கிட்டத்தட்ட பாதிப் பேர் உயிரிழந்துள்ளதைக் காட்டுகிறது.
கடந்த மே மாதத்தின் நடுப்பகுதியில் இந்த எபோலா தொற்றுப் பரவல் அதிகாரபூர்வமாக அறிவிக்கப்பட்டது. எனினும், ஆயுத மோதல்கள், சுகாதாரக் கட்டமைப்பின் நெருக்கடி, மோசமான வீதிப் போக்குவரத்து வசதிகள் மற்றும் வைரஸ் தொடர்பான தவறான தகவல்களால் மக்கள் மத்தியில் ஏற்பட்டுள்ள அவநம்பிக்கை உள்ளிட்ட பல்வேறு காரணங்களால் தொற்றைக் கட்டுப்படுத்துவதில் அதிகாரிகள் பெரும் சவால்களை எதிர்கொண்டு வருகின்றனர்.
இந்தத் தொற்றுக்குக் காரணமான ‘புண்டிபுக்யோ’ (Bundibugyo) வகை எபோலா வைரஸுக்கு இதுவரை அங்கீகரிக்கப்பட்ட தடுப்பூசியோ அல்லது சிகிச்சையோ கண்டறியப்படவில்லை. இதுவரை கொங்கோவின் 26 மாகாணங்களில் எட்டு மாகாணங்களுக்கு இந்த வைரஸ் பரவியுள்ளது.
குறிப்பாக, இடுரி மற்றும் வடக்கு கிவு ஆகிய மாகாணங்களில் மீண்டும் தீவிரமடைந்துள்ள வன்முறைகள் சுகாதார அதிகாரிகளிடையே கவலையை ஏற்படுத்தியுள்ளன. நோயாளிகளை அணுகி சிகிச்சை வழங்குவதற்கும், தொற்றுப் பரவலைக் கட்டுப்படுத்துவதற்கும் சுகாதாரப் பணியாளர்களுக்கு தடையற்ற அனுமதி வழங்கப்பட வேண்டும் என்பதால், அப்பகுதிகளில் மோதல்களை நிறுத்துமாறு அதிகாரிகள் கோரிக்கை விடுத்துள்ளனர்.
மேலும், வைரஸ் தொற்று தொடர்பான சந்தேகம் மற்றும் தவறான தகவல்கள் காரணமாக சில சமூகங்களைச் சேர்ந்தவர்கள் சுகாதார நிலையங்கள் மற்றும் மருத்துவப் பணியாளர்களைக் குறிவைத்து தாக்குதல் நடத்தி வருவதாகவும் தெரிவிக்கப்பட்டுள்ளது. இதனால், நோயைக் கட்டுப்படுத்தும் பணிகளில் ஈடுபடும் மருத்துவக் குழுவினரின் பாதுகாப்பும் கேள்விக்குறியாகியுள்ளது.
கொங்கோவில் தீவிரமடைந்துள்ள எபோலா பரவலைக் கட்டுப்படுத்த சர்வதேச அளவில் கூடுதல் நடவடிக்கைகள் மேற்கொள்ளப்பட வேண்டும் என சுகாதார நிபுணர்கள் வலியுறுத்தியுள்ளனர். இதற்கிடையில், உகாண்டா, கென்யா மற்றும் நைஜீரியா உள்ளிட்ட பல ஆபிரிக்க நாடுகளுக்கும் இந்த வைரஸ் பரவியுள்ளதாகத் தெரிவிக்கப்படுகிறது.
1976ஆம் ஆண்டு எபோலா வைரஸ் முதன்முதலில் கண்டறியப்பட்டதிலிருந்து உலகின் பல்வேறு பகுதிகளில் டஜன் கணக்கான தொற்றுப் பரவல்கள் பதிவாகியுள்ளன.
இதற்கு முன்னர், 2014 முதல் 2016ஆம் ஆண்டு வரை மேற்கு ஆபிரிக்காவில் ஏற்பட்ட எபோலா பரவலே மிக மோசமானதாகக் கருதப்பட்டது. அப்போது சுமார் 28,000 பேர் தொற்றுக்குள்ளானதுடன், 11,000க்கும் அதிகமானோர் உயிரிழந்தனர்.
எனினும், தற்போதைய கொங்கோ தொற்றுப் பரவல் ஏற்கனவே உலகின் இரண்டாவது மிக மோசமான எபோலா பரவலாக உருவெடுத்துள்ளது. தொற்றுப் பரவல் அறிவிக்கப்பட்டதிலிருந்து ஒப்பிடத்தக்க காலப்பகுதியில், மேற்கு ஆபிரிக்காவில் பதிவானதை விட குறைந்தது மூன்று மடங்கு அதிகமான தொற்றாளர்களும் உயிரிழப்புகளும் பதிவாகியுள்ளதாகத் தெரிவிக்கப்பட்டுள்ளது.
