விடைபெறுகிறார் கால்பந்தின் ராஜா CR7! சர்வதேச கால்பந்து போட்டியில் ஓய்வு: 23 ஆண்டுகால பயணம் நிறைவு.
“ஒரு சகாப்தம் முடிவுக்கு வந்தது” என்று சொல்வதை விட, ஒரு வரலாற்றுப் காவியம் தன் கடைசிப் பக்கத்தை எழுதி முடித்திருக்கிறது என்றுதான் சொல்ல வேண்டும். போர்ச்சுகல் தேசத்தின் முகமாகவும், உலகக் கால்பந்தின் அசைக்க முடியாத அடையாளமாகவும் விளங்கிய நம்ம கிறிஸ்டியானோ ரொனால்டோ சர்வதேச கால்பந்து போட்டிகளில் இருந்து தனது ஓய்வை அறிவித்துள்ளார்!
“7 ஆம் எண் ஜெர்சியை மீண்டும் எனது தாய்நாட்டிடமே ஒப்படைக்கும் நாள் வந்துவிட்டது…” என்ற அவரது வார்த்தைகள் ஒவ்வொரு CR7 ரசிகனின் இதயத்தையும் கணக்கச் செய்திருக்கிறது.
கடந்த 2003 ஆம் ஆண்டு ஆகஸ்ட் மாதம் ஒரு சிறுவனாக போர்ச்சுகல் ஜெர்சியை அணிந்து களமிறங்கிய அந்த பயணம், இதோ 23 ஆண்டுகள்… உலகக் கால்பந்து வரலாற்றில் யாராலும் எட்டிப்பிடிக்க முடியாத இமயமாய் உயர்ந்து இன்று நிறைவடைந்துள்ளது.
அந்த அசாத்தியமான சாதனைகளின் புள்ளிவிவரங்கள்:
234 சர்வதேச போட்டிகள் (உலக சாதனை)
146 சர்வதேச கோல்கள் (உலக சாதனை)
Euro 2016 சாம்பியன்
2 முறை UEFA Nations League சாம்பியன் (2019, 2025)
6 உலகக் கோப்பைகளில் கோல் அடித்த ஒரே வீரர்!
“நான் அடித்த கோல்கள் யாரையாவது ஒரு நிமிடம் மகிழ்ச்சியாக இருக்க வைத்திருந்தால், உங்களது கவலைகளை மறக்கச் செய்திருந்தால், என் நாட்டின் மீது உங்களை பெருமைகொள்ள வைத்திருந்தால்… நான் செய்த தியாகங்கள் அனைத்தும் அர்த்தமுள்ளதாக மாறுகிறது” என்று ரொனால்டோ உருகியுள்ளார்.
போர்ச்சுக்கல் அணிக்காக நீங்கள் சிந்திய வியர்வையும், கண்ணீரும், காட்டிய அசாத்திய அர்ப்பணிப்பும் என்றென்றும் தனித்துவமானது. சர்வதேச அரங்கில் இருந்து நீங்கள் விடைபெறுவது, கால்பந்து விளையாட்டின் ஒரு பொற்காலத்தை அப்படியே முடிவுக்குக் கொண்டுவந்துள்ளது.
கோப்பைகள் அருங்காட்சியகத்திற்குச் செல்லலாம், சாதனைகள் நாளை முறியடிக்கப்படலாம், ஆனால் ரசிகர்களின் இதயங்களில் நீங்கள் பிடித்துள்ள இடத்தை காலத்தால் என்றும் அழிக்க முடியாது!
தேசிய அணியின் சிவப்பு மற்றும் பச்சை நிற ஜெர்சியில் இனி உங்களை பார்க்க முடியாது என்பது ஏமாற்றமாக இருந்தாலும், நீங்கள் கொடுத்த நினைவுகளுக்கு நன்றி.
அவரது அறிவிப்பின் தமிழ் வடிவம் கீழே:
866 சொற்களைக் கொண்ட தனது உரையில் அவர் இவ்வாறு குறிப்பிட்டார்:
“நமது தேசிய அணியின் 7-ஆம் எண் கொண்ட சீருடையை ஒப்படைப்பதற்கான நாள் வந்துவிட்டது. இது எனக்கு மட்டுமே சொந்தமானது என்று நான் ஒருபோதும் கருதியதில்லை. ஆனால், கடந்த 23 ஆண்டுகளாக, இந்தச் சீருடையை அணிவதற்கும், அதைக் காப்பதற்கும், உலகம் முழுவதிலும் உள்ள மைதானங்களுக்கு அதை எடுத்துச் செல்வதற்கும் எனக்குக் கிடைத்த வாய்ப்பையும் பொறுப்பையும் நான் பெரும் பேறாகக் கருதுகிறேன்.”
“இன்று, இதை அடுத்த தலைமுறையினரிடம் ஒப்படைக்க வேண்டிய நேரம் வந்துவிட்டது. இது எளிதான முடிவல்ல; ஏனெனில், சில முடிவுகள் வெறும் அறிவால் மட்டும் எடுக்கப்படுவதில்லை, அவை இதயத்திலிருந்தும் பிறக்கின்றன.”
“2003-ஆம் ஆண்டு ஆகஸ்ட் மாதம் தொடங்கி, என் வாழ்வையே முற்றிலுமாக மாற்றியமைத்த ஒரு பயணம் இப்போது முடிவுக்கு வருகிறது. தேசிய அணியுடனான எனது காலத்தைப் பின்னோக்கிப் பார்க்கும்போது, எனக்கு நினைவுக்கு வருவது வெறும் போட்டிகள், கோல்கள், சாதனைகள் அல்லது கோப்பைகள் மட்டுமல்ல.”
“கோல்கள் காலப்போக்கில் மறையலாம், கோப்பைகள் அருங்காட்சியகங்களில் சேமிக்கப்படலாம், சாதனைகள் ஒரு கட்டத்தில் முறியடிக்கப்படலாம். ஆனால், காலத்தால் அழிக்க முடியாத ஒன்று உண்டு; அது மக்களின் இதயங்களில் நாம் பெற்றுள்ள இடம்.”
மேலும், அந்த முன்கள வீரர் தனது சக வீரர்களுக்கு நன்றி தெரிவித்தார்: “நாங்கள் ஓடிய ஒவ்வொரு ஓட்டத்திற்காகவும், கட்டியணைத்துக் கொண்ட தருணங்களுக்காகவும், விவாதங்களுக்காகவும், ஆடுகளத்திற்குள் நுழைவதற்கு முன் நிலவிய அந்த அமைதிக்காகவும், இணைந்து கொண்டாடிய வெற்றிகளுக்காகவும், நம்மை இன்னும் வலிமையாக்கிய தோல்விகளுக்காகவும் உங்களுக்கு நன்றி.”
அதே காலை வேளையில், போர்ச்சுகீசிய கால்பந்து கூட்டமைப்பு ஒரு அறிக்கையை வெளியிட்டது. அதில், “தங்கள் அணியின் நிரந்தரத் தலைவருக்கு” ஆழ்ந்த நன்றியைத் தெரிவித்துக் கொண்டதோடு, “கிறிஸ்டியானோ ரொனால்டோவின் மகத்தான விளையாட்டு வாழ்க்கையைப் போற்றும் வகையில் தகுந்த கௌரவ நிகழ்வு” ஒன்றை நடத்தத் திட்டமிட்டுள்ளதாகவும் அறிவித்தது.
