தென் அமெரிக்க மற்றும் மத்திய அமெரிக்க பிராந்தியங்களை உலுக்கும் வகையில் பனாமாவில் ஏற்பட்ட 7.7 ரிக்டர் அளவிலான சக்திவாய்ந்த நிலநடுக்கம் காரணமாக அந்நாட்டிற்கும் பல அண்டை நாடுகளுக்கும் கடும் பாதிப்புகள் ஏற்பட்டுள்ளன.
இலங்கை நேரப்படி நேற்று (9) இரவு ஏற்பட்ட இந்த அசாதாரண சூழ்நிலையைத் தொடர்ந்து பிராந்தியம் முழுவதும் சுனாமி எச்சரிக்கைகள் விடுக்கப்பட்டதுடன், கொலம்பியா, ஈக்வடார், நிகரகுவா, கோஸ்டாரிக்கா மற்றும் குவாத்தமாலா ஆகிய நாடுகளுக்கும் இந்த ஆபத்து பரவியது.
அமெரிக்க புவியியல் ஆய்வகத்தின் (USGS) கூற்றுப்படி, பனாமா நகரத்திலிருந்து சுமார் 200 கிலோமீட்டர் தொலைவில் அமைந்துள்ள மக்கள் நடமாட்டம் குறைந்த பகுதியில், 12.6 கிலோமீட்டர் ஆழத்தில் இந்த நிலநடுக்கம் மையம் கொண்டுள்ளது.
இதுவரை 80க்கும் மேற்பட்ட தொடர் அதிர்வுகள் (aftershocks) பதிவாகியுள்ளதுடன், பீதியடைந்த ஆயிரக்கணக்கான மக்கள் பாதுகாப்பிற்காக வீதிகளில் தஞ்சமடைந்துள்ளனர்.
பனாமா நகரத்திற்கு தென்மேற்கே அமைந்துள்ள பெனொனோம் நகரத்திலுள்ள ஹோட்டல் ஒன்றின் பகுதி இடிந்து விழுந்தது உட்பட பல கட்டிடங்கள் சேதமடைந்துள்ளன.
எனினும், நல்வாய்ப்பாக இதுவரை உயிரிழப்புகளோ அல்லது பலத்த காயங்களோ பதிவாகவில்லை.
ஆயினும், அந்நாட்டின் 6 மாகாணங்களில் மின்வெட்டு ஏற்பட்டுள்ளதாக தகவல்கள் தெரிவிக்கின்றன.
இந்த அவசரநிலைக்கு மத்தியிலும், நாட்டின் முக்கிய பொருளாதார மையங்களான பனாமா கால்வாய், கோப்ரே பனாமா செம்புச் சுரங்கம் மற்றும் தொகுமென் சர்வதேச விமான நிலையம் ஆகியவை தற்போது வழக்கம் போல் இயங்கி வருகின்றன.
இருப்பினும், இந்த பேரிடர் காரணமாக பனாமாவின் மொத்த உள்நாட்டு உற்பத்தியில் (GDP) 1% முதல் 10% வரை பொருளாதார இழப்பு ஏற்படக்கூடும் என கணிக்கப்பட்டுள்ளது.
சமீபத்தில் வெனிசுலா மற்றும் கொலம்பியாவில் ஏற்பட்ட சக்திவாய்ந்த நிலநடுக்கங்களுடன் ஒப்பிடும்போது, இந்த நிலநடுக்கத்தில் ஆயிரக்கணக்கான உயிர்கள் பலியாகும் கொடூரமான அசம்பாவிதம் தவிர்க்கப்பட்டதற்கு முதன்மை காரணம், அப்பகுதியில் 43,000 என்ற குறைந்தளவிலான மக்களே வசித்து வந்தமையாகும்.
வெனிசுலா மற்றும் கொலம்பியா போன்ற பிராந்தியங்களில் நிலநடுக்கம் ஏற்பட்ட போது அங்கு 1.4 மில்லியன் முதல் 1.6 மில்லியனுக்கும் அதிகமான மக்கள் வசித்து வந்தனர் என்பது குறிப்பிடத்தக்கது.
