சுவிஸ் அரசின் அமைச்சர் கை பார்மலின் (Guy Parmelin) இந்த ஆண்டு இறுதியில் பதவியிலிருந்து விலகுகிறார். டிசம்பரில் நாடாளுமன்றம் புதிய அமைச்சரைத் தேர்ந்தெடுக்கும். அப்போது அமைச்சர்களின் துறைகள் மாறவும் வாய்ப்பு இருக்கிறது.
பார்மலின் பொருளாதாரத் துறையைப் பார்த்து வந்தவர். விவசாயம், வேலைவாய்ப்பு, கல்வி, ஆராய்ச்சி ஆகியவை இதில் வருகின்றன. ஐரோப்பிய ஒன்றியத்துடனான ஒப்பந்தங்களும் இதன் பொறுப்புதான். அதனால் இந்தத் துறைக்கு நல்ல போட்டி இருக்கிறது.
இப்போது இருக்கும் அமைச்சர்களில் சிலர் இந்தத் துறையை விரும்புவதாகப் பேச்சு அடிபடுகிறது. நீதித்துறை அமைச்சர் பேட் யான்ஸ் (Beat Jans) அவர்களில் ஒருவர். அகதிகள் விவகாரம் அவர் கையில் இருக்கிறது. அதற்கு அடிக்கடி விமர்சனம் வருகிறது. மாற்றம் வந்தால் யோசிக்க வேண்டியதுதான் என்று அவரே ஒரு பேட்டியில் சொன்னார்.
ஆனால் யான்ஸ் சோசலிசக் கட்சியைச் சேர்ந்தவர். இதுவரை சோசலிசக் கட்சி அமைச்சர் பொருளாதாரத் துறையை நடத்தியதில்லை. சுவிஸ் தொழில்துறையின் பெரிய அமைப்பான economiesuisse-இன் புதிய தலைவர் சில்வன் வில்ட்ஹேபர் (Silvan Wildhaber) உடனே கருத்துச் சொன்னார். இந்தத் துறை வலதுசாரிக் கட்சிகளின் கையிலேயே இருக்க வேண்டும் என்றார்.
பாதுகாப்புத் துறை அமைச்சர் மார்ட்டின் பிஃபிஸ்டர் (Martin Pfister), துறைகளை யாருக்குக் கொடுப்பது என்பதை டிசம்பர் தேர்தலுக்குப் பிறகு அரசு முடிவு செய்யும் என்கிறார். அல்பர்ட் ரோஸ்டி (Albert Rösti) எதுவும் சொல்லவில்லை. புதிதாகத் தேர்ந்தெடுக்கப்படுபவருக்குப் பார்மலின் துறை தானாகக் கிடைக்கும் என்று சொல்ல முடியாது. ஏற்கனவே பதவியில் இருப்பவர்களுக்கே முன்னுரிமை உண்டு.
மூலம்: RSI
புகைப்படம்: Andreas Fischinger / Unsplash
