இத்தாலியில் வகுப்பறைகளில் வெளிநாட்டு மாணவர்களின் எண்ணிக்கையை கட்டுப்படுத்துவது மற்றும் பாடசாலைகளில் பர்தா மற்றும் நிகாப் ஆகியவற்றை அணிவதை தடை செய்வது தொடர்பான நடவடிக்கையை விரைவில் அறிமுகம் செய்யவுள்ளதாக இத்தாலிய பிரதமர் ஜிர்ஜியா மெலோனி தெரிவித்துள்ளார்.
“பாடசாலை அமைப்பில் ஒன்றிணைவதில் கடுமையான சிரமங்களை எதிர்கொள்ளும்” வெளிநாட்டு மாணவர்களின் பெற்றோர்களுக்கு இத்தாலிய மொழி பாடங்களை கட்டாயமாக்கும் அம்சமும் இந்த நடவடிக்கையில் அடங்கும் என்று, தனது தேசியவாத-பழமைவாத கட்சியான ‘பிரதர்ஸ் ஆஃப் இத்தாலி’யின் (Brothers of Italy) இளைஞர் அணியினரிடம் மெலோனி கூறியுள்ளதாக வௌிநாட்டு செய்திகள் தெரிவிக்கின்றன.
ரோமில் நடைபெற்ற தேசிய விழா ஒன்றில், பிரதமர் ஜிர்ஜியா மெலோனி பேசுகையில், “இத்தாலிக்கு வந்து இங்கே தங்கள் எதிர்காலத்தை உருவாக்க விரும்பும் எவரும் எங்கள் மொழியை கற்க வேண்டும், எங்கள் கலாச்சாரத்தை புரிந்துகொள்ள வேண்டும் மற்றும் எங்கள் விதிகளை மதிக்க வேண்டும். அவர்களை வரவேற்பதற்கான ஒரே முறையான வழி இதுதான் என கூறினார்.
குறிப்பாக, சில முஸ்லிம் பெண்கள் அணியும் முழு உடலையும் மறைக்கும் ஆடையான ‘பர்தா’ மற்றும் கண்களை தவிர முகத்தின் மற்ற பகுதிகளை மறைக்கும் ‘நிகாப்’ ஆகியவற்றுக்கான தடை குறித்து மெலோனி குறிப்பிட்டார்.
ஆனால், சில முஸ்லிம் பெண்கள் அணியும் தலைக்கு அணியும் துணியான ‘ஹிஜாப்’ பற்றி அவர் குறிப்பிடவில்லை. அரசாங்கத்தால் அங்கீகரிக்கப்பட்ட பிறகு, இந்த நடவடிக்கை சட்டமாக மாறுவதற்கு 60 நாட்களுக்குள் பாராளுமன்றத்தின் அங்கீகாரத்தை பெற வேண்டியிருக்கும் என்பது குறிப்பிடத்தக்கது.
