இலங்கையின் ஊழல் எதிர்ப்பு கட்டமைப்பை மேலும் வலுப்படுத்தும் நோக்கில் திருத்தப்பட்ட ஊழல் எதிர்ப்புச் சட்டமூலத்தை பிரதமர் கலாநிதி ஹரிணி அமரசூரிய, இன்று (ஆகஸ்ட் 19) நாடாளுமன்றத்தில் சமர்ப்பித்துள்ளார்.
பிரதமரின் ஊடகப் பிரிவு தெரிவித்ததன்படி, இந்தத் திருத்தங்களின் மூலம் ஊழலைத் தடுப்பது, விசாரணை நடத்துவது மற்றும் வழக்குத் தொடர்வது மேலும் வலுப்படுத்தப்படுவதுடன், அரச துறையில் வெளிப்படைத்தன்மை, பொறுப்புக்கூறல் மற்றும் நல்லாட்சி மேம்படுத்தப்படவுள்ளது.
நடைமுறையில் உள்ள சட்டத்தை அமுல்படுத்தியபோது அடையாளம் காணப்பட்ட சட்டரீதியான மற்றும் விளக்கமளிப்பு தொடர்பான பிரச்சினைகளை தீர்ப்பதும் திருத்தங்களின் நோக்கமாகும். குறிப்பாக, சட்டத்தின் சிங்கள மற்றும் ஆங்கில மொழிப் பதிப்புகளுக்கு இடையிலான முரண்பாடுகளும் இதில் கவனத்தில் கொள்ளப்பட்டுள்ளன.
மேலும், ஊழல் தொடர்பான விசாரணைகள் மற்றும் வழக்குத் தொடர்வதில் காணப்படும் நடைமுறை மற்றும் தொழில்நுட்ப சிக்கல்கள், இலஞ்சம் அல்லது ஊழல் குற்றச்சாட்டுகளை விசாரிக்கும் ஆணைக்குழுவின் (CIABOC) நிர்வாகம், அத்துடன் மையப்படுத்தப்பட்ட மின்னணு முறைமை மூலம் சொத்து மற்றும் பொறுப்புகள் தொடர்பான பிரகடனங்களை சமர்ப்பித்தல் ஆகியவற்றிலும் மாற்றங்கள் முன்மொழியப்பட்டுள்ளன.
இந்தத் திருத்தங்கள், CIABOC தனது பணிகளை மேலும் வலுவாகவும் திறம்படவும் மேற்கொள்வதற்குத் தேவையான சட்டக் கட்டமைப்பை வலுப்படுத்தும் என அரசாங்கம் தெரிவித்துள்ளது.
