கர்ப்பகாலத்தில் ஏற்படும் மூளை மாற்றம் – உண்மையில் என்ன நடக்கிறது?

கர்ப்பகாலத்தில் பெண்கள் வழக்கத்தைவிட அதிகமாக மறதி ஏற்படுவதாகவும், கவனம் செலுத்துவதில் சிரமம் இருப்பதாகவும் அடிக்கடி கூறப்படுவது உண்டு. இதனை பொதுவாக“Pregnancy Brain” (கர்ப்பகால மூளை மாற்றம்) என்று அழைக்கின்றனர்.

ஆனால், இதற்குப் பின்னால் என்ன இருக்கிறது என்பதைப் புரிந்துகொள்ள விஞ்ஞானிகள் ஆய்வு மேற்கொண்டுள்ளனர்.

ஹார்மோன் மாற்றங்களுடன் தொடர்பு

கர்ப்பகாலத்தில் பெண்களின் உடலில் பல்வேறு ஹார்மோன் மாற்றங்கள் ஏற்படுகின்றன. குறிப்பாக ஈஸ்ட்ரோஜன் (Estrogen) அளவில் ஏற்படும் மாற்றங்கள் மூளையின் செயல்பாடுகளிலும் தாக்கத்தை ஏற்படுத்தக்கூடும் என ஆய்வுகள் சுட்டிக்காட்டுகின்றன.

சமீபத்திய Science Bulletin ஆய்வொன்றில், கர்ப்பகாலத்தில் ஏற்படும் ஈஸ்ட்ரோஜன் மாற்றங்கள் மூளையின் குறிப்பிட்ட பகுதிகளில் மாற்றங்களை ஏற்படுத்தக்கூடும்எனக் கண்டறியப்பட்டுள்ளது.

இந்த ஆய்வு மனிதர்களில் நேரடியாக மேற்கொள்ளப்பட்டதல்ல. எலிகளைப் பயன்படுத்தி மேற்கொள்ளப்பட்ட ஆய்வில், கர்ப்பகால ஹார்மோன் மாற்றங்களுக்கும் மூளையின் செயல்பாடுகளுக்கும் இடையிலான தொடர்பு ஆராயப்பட்டது.

மூளையின் குறிப்பிட்ட பகுதியில் மாற்றம்

ஆய்வாளர்கள் குறிப்பாக மூளையின் Hypothalamus (ஹைப்போதாலமஸ்) எனப்படும் பகுதியை கவனத்தில் கொண்டனர். இது பசி, உடல் வெப்பநிலை, ஹார்மோன் கட்டுப்பாடுஉள்ளிட்ட பல முக்கிய உடல் செயல்பாடுகளை ஒழுங்குபடுத்தும் பகுதியாகும்.

கர்ப்பகாலத்தில் ஏற்படும் ஹார்மோன் மாற்றங்கள் இந்தப் பகுதியில் மாற்றங்களை ஏற்படுத்தி, தாயின் நடத்தை மற்றும் உடல் தேவைகளில் மாற்றங்களை உருவாக்கக்கூடும் என ஆய்வு தெரிவிக்கிறது.

அதனால், கர்ப்பகாலத்தில் ஏற்படும் மறதி அல்லது கவனச்சிதறல் என்பது வெறுமனே ஒரு கற்பனை அல்ல; கர்ப்பகாலத்தில் உடலில் ஏற்படும் ஹார்மோன் மற்றும் மூளைமாற்றங்களுடன் அது தொடர்புடையதாக இருக்கலாம் என விஞ்ஞானிகள் கருதுகின்றனர்.

இருப்பினும், இந்த ஆய்வு எலிகளில் மேற்கொள்ளப்பட்டதால், இதன் முடிவுகளை மனிதர்களுக்கு நேரடியாகப் பொருத்திப் பார்ப்பதில் எச்சரிக்கை அவசியம். மனிதர்களில்இதன் தாக்கத்தை உறுதிப்படுத்த மேலும் ஆய்வுகள் தேவை.