சுவிட்சர்லாந்து – லண்டன் இடையே நேரடி ரயில் சேவை; மகிழ்ச்சியில் மக்கள்

சுவிட்சர்லாந்துக்கும் லண்டனுக்கும் இடையே நேரடி ரயில் சேவையை அறிமுகப்படுத்துவதற்கு பெரும்பாலான சுவிஸ் மக்கள் ஆதரவு தெரிவித்துள்ளனர். விமானப் பயணத்துக்குப் போட்டியாகவும், சுற்றுச்சூழல் பாதிப்பைக் குறைக்கும் வகையிலும் இந்த ரயில் இணைப்பு முக்கியமானதாகக் கருதப்படுகிறது.

YouGov நிறுவனம் நடத்திய கருத்துக் கணிப்பில், பங்கேற்றவர்களில் 58 சதவீதம் பேர் நேரடி ரயில் சேவைக்கு ஆதரவுதெரிவித்துள்ளனர். 8 சதவீதம் பேர் மட்டுமே எதிர்ப்புத் தெரிவித்துள்ளனர். மொத்தம் 1,048 பேரிடம் நடத்தப்பட்ட இந்தக் கருத்துக் கணிப்பு, T&E, actif-trafiC மற்றும் ATE ஆகிய அமைப்புகளின் ஆதரவுடன் மேற்கொள்ளப்பட்டது.

விமானப் பயணத்தைத் தவிர்க்க என்ன தேவை?

விமானப் பயணத்தைத் தேர்ந்தெடுப்பதற்கு அதன் வேகமே முக்கியக் காரணம் என 79 சதவீதம் பேர் தெரிவித்துள்ளனர். ரயில் பயணத்தை ஊக்குவிக்கப் பின்வரும் அம்சங்கள் அவசியம் எனக் குறிப்பிடப்பட்டுள்ளது:

• 61% – குறைந்த பயணக் கட்டணம்

• 37% – நேரடி ரயில் இணைப்பு

• 37% – பயண நேரத்தைக் குறைத்தல்

ரயில் பயணத்தைத் தேர்ந்தெடுப்பதற்கான காரணங்களாக, அதன் மீதான விருப்பத்தை 58 சதவீதம் பேரும், சுற்றுச்சூழலுக்கு ஏற்படும் பாதிப்பு குறைவாக இருப்பதை 55 சதவீதம் பேரும், நகர மையங்களில் ரயில் நிலையங்கள் அமைந்திருப்பதை 45 சதவீதம் பேரும் குறிப்பிட்டுள்ளனர்.

T&E அமைப்பைச் சேர்ந்த விக்டர் தெவெனே கூறுகையில், “பாரிஸில் ரயில் மாறிச் செல்ல வேண்டிய தேவையை நீக்கினால், ஜெனீவாவிலிருந்து லண்டன் செல்வதற்கான பயண நேரத்தை ஏழு மணித்தியாலங்களுக்கும் மேலான நிலையிலிருந்து சுமார் ஐந்தரை மணித்தியாலங்களாகக் குறைக்க முடியும்” எனத் தெரிவித்துள்ளார்.

2030களில் சேவை தொடங்குமா?

சுவிஸ் ரயில்வே நிறுவனமான SBB, பிரான்ஸின் SNCF மற்றும் Eurostar நிறுவனங்களுடன் புரிந்துணர்வு ஒப்பந்தத்தில் கையெழுத்திட்டுள்ளது.

எனினும், இந்த நேரடி ரயில் சேவையை நடைமுறைப்படுத்துவதில் இன்னும் பல தடைகள் உள்ளன. இதனால், 2030களிலேயே இந்தச் சேவை அறிமுகப்படுத்தப்படும் என எதிர்பார்க்கப்படுகிறது.