நாடு முழுவதும் 250 அதிக ஆபத்துள்ள பகுதிகளில் கிட்டத்தட்ட 15,000 குடும்பங்கள் வசித்து வருவதாகவும், இதனால் அவர்கள் நிலச்சரிவுகள் மற்றும் பாறை சரிவுகளுக்கு ஆளாக நேரிடும் என்றும் தேசிய கட்டிட ஆராய்ச்சி அமைப்பு (NBRO) எச்சரித்துள்ளது.
230 நிலச்சரிவு மண்டலங்களும் 20 பாறை சரிவுப் பகுதிகளும் அடையாளம் காணப்பட்டுள்ளதாக அதிகாரிகள் தெரிவித்தனர்.
இந்த அபாய மண்டலங்களில் பலர் வீடுகளைக் கட்டியுள்ளனர் அல்லது சட்டவிரோதமாக குடியேறியுள்ளனர், இது ஆபத்தை அதிகரிக்கிறது என்பதையும் அதிகாரிகள் சுட்டிக்காட்டியுள்ளனர்.
எதிர்காலத்தில் நிலச்சரிவுகள் ஏற்படுவதைத் தடுக்க, சில பகுதிகளில் பெரிய, நிலையற்ற பாறைகளை அகற்ற அரசாங்கம் திட்டமிட்டுள்ளது.
ஆனால், இதற்கு பாடசாலைகள், வைத்தியசாலைகள் மற்றும் முக்கியமான வணிகங்களுக்கு அருகில் உள்ளவர்கள் உட்பட, குடியிருப்பாளர்களை வெளியேற்ற வேண்டியிருக்கும்.
இதனால் இந்த செயற்பாடு மிகவும் சவாலானது என சுட்டிக்காட்டப்பட்டுள்ளது.
பாதுகாப்பான பகுதிகளுக்குச் செல்லுமாறு பலமுறை எச்சரிக்கைகள் விடுக்கப்பட்ட போதிலும், சமூக மற்றும் பொருளாதார காரணங்களால் பலர் வெளியேற மறுத்துவிட்டனர்.
தற்போது, இந்த அதிக ஆபத்துள்ள மண்டலங்களில் சுமார் 60,000 பேர் வசிக்கின்றனர்.
உடனடியாக நடவடிக்கை எடுக்கப்படாவிட்டால், கீழ் கடுகண்ணாவ சோகம் போன்ற பேரழிவுகள் மீண்டும் நிகழக்கூடும் என்று தேசிய கட்டிட ஆராய்ச்சி அமைப்பின் மூத்த புவியியலாளர் லக்சிறி இந்திரதிலக கூறினார்.
பொருத்தமான நிலம் இல்லாததாலும், புதிய பகுதிகள் நல்ல பொருளாதார வாய்ப்புகளை வழங்காததாலும் முந்தைய மீள்குடியேற்றத் திட்டங்கள் தோல்வியடைந்தன என்று அவர் மேலும் கூறினார்.
அரசாங்கத்தால் வழங்கப்பட்ட அடுக்குமாடி குடியிருப்புத் திட்டம் கூட குடியிருப்பாளர்களால் நிராகரிக்கப்பட்டது.
சட்டவிரோத கட்டுமானங்கள் குறித்து தேசிய கட்டிட ஆராய்ச்சி அமைப்பு மாவட்ட அதிகாரிகளுக்கு தொழில்நுட்ப ஆலோசனைகளை வழங்கியுள்ளதாகவும் இந்திரதிலக தெரிவித்துள்ளார்.
அதிக ஆபத்துள்ள பகுதிகளைக் கொண்ட 13 மாவட்டங்களில் பதுளை, கண்டி, நுவரெலியா, இரத்தினபுரி, கேகாலை, களுத்துறை, காலி, மாத்தறை, ஹம்பாந்தோட்டை, கம்பஹா, மொனராகலை மற்றும் குருநாகல் ஆகியவை அடங்கும்.
இயற்கை காரணங்களும் மனித நடவடிக்கைகளும் எதிர்கால பேரழிவுகளின் அபாயத்தை தொடர்ந்து அதிகரித்து வருவதாக அவர் எச்சரித்தார்.
