உணவு டெலிவரி நிறுவனமான ஜஸ்ட் ஈட் (Just Eat), சுவிஸ் ஜெர்மன் மொழிப் பகுதி நகரங்களில் கிட்டத்தட்ட 370 கூரியர்களை வேலையிலிருந்து நீக்குகிறது. அடுத்த வாரம் அவர்களுக்கு நோட்டீஸ் வருகிறது.
இவர்கள் இதுவரை நிறுவனத்தின் நிரந்தர ஊழியர்கள். நிலையான சம்பளம் இருந்தது. விடுமுறைக்கும் சம்பளம் கிடைத்தது. இனி நிறுவனம் சுயதொழில் செய்பவர்களைத்தான் வேலைக்கு வைக்கப் போகிறது. அப்படி என்றால் குறைந்தபட்ச சம்பளம் கிடையாது. வேலைக்குப் பாதுகாப்பும் கிடையாது. போட்டி நிறுவனமான உபர் ஈட்ஸ் (Uber Eats) ஏற்கெனவே இப்படித்தான் செய்கிறது. தேவைக்கு ஏற்ப மாற முடியாவிட்டால் போட்டியில் நிற்க முடியாது என்கிறது ஜஸ்ட் ஈட்.
சுவிஸ் உச்ச நீதிமன்றம் (Bundesgericht) இந்த முறை சட்டப்படி தவறு என்று பலமுறை சொல்லியிருக்கிறது. ஆனாலும் ஜெனீவா (Genève), வோ (Vaud) மாநிலங்களில் மட்டுமே இது கண்டிப்பாக நடைமுறையில் இருக்கிறது. அந்த இரண்டு இடங்களிலும் ஜஸ்ட் ஈட் கூரியர்களை நிரந்தரமாகவே வைத்திருக்கும்.
சூரிச்சில் (Zürich) கூரியர்கள் வேலைநிறுத்தம் செய்தனர். சென் காலன் (St. Gallen), பேர்ன் (Bern) நகரங்களிலும் ஆர்ப்பாட்டம் நடந்தது. சிண்டிகாம் (Syndicom), யூனியா (Unia) தொழிற்சங்கங்கள் அவர்களுக்குத் துணை நிற்கின்றன. நாடு முழுவதுக்கும் ஒரே தீர்வு வேண்டும் என்று சூரிச் மாநில அதிகாரிகள் சொல்கிறார்கள். பாசல் (Basel) நகரில் ஒரு சிறிய டெலிவரி நிறுவனம் மூடப்படுகிறது. சமமில்லாத போட்டிதான் காரணம் என்கிறார் அதன் உரிமையாளர்.
பேர்னில் வேலை செய்யும் 41 வயது வில்லிக்கும் நோட்டீஸ் வருகிறது. புதிய நிபந்தனைகளுடன் தொடர்வது தன்னால் முடியாது என்கிறார் அவர்.
மூலம்: SRF
புகைப்படம்: Rowan Freeman / Unsplash
