கிளாரூஸ் மாநிலத்தில் (Glarus) பயன்படுத்தப்படாமல் கிடக்கும் பழைய மரக் கொட்டகைகளுக்குப் புது வாழ்வு கொடுக்க ஒரு திட்டம் தொடங்கியுள்ளது. இதற்காக மக்களிடமிருந்து 90 யோசனைகள் வந்துள்ளன.
இந்தக் கொட்டகைகளை அங்கே “காடன்” (Gaden) என்று சொல்கிறார்கள். முன்பு மாடுகளை வைக்கவும், வைக்கோல் சேமிக்கவும் இவற்றைப் பயன்படுத்தினார்கள். இப்போது கிட்டத்தட்ட 800 கொட்டகைகள் காலியாகக் கிடக்கின்றன. ஆள் இல்லாத கட்டடங்கள் சீக்கிரம் இடிந்துவிடும் என்கிறார் திட்டத் தலைவரான கட்டடக் கலைஞர் ரேட்டோ ஃபுக்ஸ் (Reto Fuchs).
மத்திய அரசு, கிளாரூஸ் மாநில அரசு, உள்ளூர் நகராட்சிகள் எல்லோரும் இதில் சேர்ந்துள்ளனர். மாநிலத்தில் உள்ள மூன்று நகராட்சிகளிலும் ஒவ்வொரு பகுதி தேர்வு செய்யப்பட்டது. அங்கே பல கொட்டகைகள், கல் சுவர்கள், பாதைகள், சுற்றியுள்ள இயற்கை எல்லாம் சேர்ந்து ஒரு தொகுப்பாகப் பார்க்கப்படுகிறது.
வந்த யோசனைகள் பலவிதம். கொட்டகையில் ஓர் இரவு தங்கி இயற்கையை ரசிப்பது, உள்ளூர்ப் பொருட்களை விற்பது, யோகா வகுப்புகள், கலை நிகழ்ச்சிகள், வவ்வால்களுக்குத் தங்குமிடம் என்று பல. ஆனால் இந்தக் கொட்டகைகள் விவசாய நிலப் பகுதியில் உள்ளன. அதனால் சட்ட விதிகள் நிறைய. இப்போதைக்கு நிரந்தரமாகத் தங்குவதற்கு அனுமதி கிடைக்காது.
வரும் வாரங்களில் யோசனைகளைப் பரிசீலிப்பார்கள். சிலவற்றைத் தற்காலிகமாகச் சோதித்துப் பார்ப்பார்கள். திட்டத்துக்கு 3 லட்சம் பிராங்க் செலவாகும். அதில் பாதியை மத்திய அரசு தருகிறது. பிறகு கொட்டகைகளின் உரிமையாளர்களையும் யோசனை சொன்னவர்களையும் ஒன்றாகச் சேர்க்கும் கூட்டம் நடக்கும். இந்த வரலாற்றுக் கொட்டகைகளை நீண்ட காலத்துக்குக் காப்பாற்றுவதே இலக்கு.
மூலம்: SRF
புகைப்படம்: Markus Petritz / Unsplash
