ஐரோப்பா முழுவதும் இளைஞர்கள் தெருவில் இறங்கிப் போராடுகிறார்கள். பெர்னில் (Bern) நடக்கும் இளைஞர் அமர்வில் (Jugendsession) கலந்துகொள்ளும் சுவிஸ் இளைஞர்கள் இதைப் பற்றித் தங்கள் கருத்தைச் சொல்கிறார்கள்.
வேலை கிடைக்குமா என்ற பயம், தரமற்ற கல்வி, உயரும் வாழ்க்கைச் செலவு. இவைதான் மற்ற நாடுகளில் போராட்டத்துக்குக் காரணம். சூரிச் (Zürich), பாசல் (Basel) நகரங்களிலும் போராட்டங்கள் நடந்தன. சில இடங்களில் கலவரமும் வெடித்தது. நவம்பர் இறுதியில் பெரிய இளைஞர் வேலைநிறுத்தமும் திட்டமிடப்பட்டுள்ளது.
இளைஞர் அமர்வில் இருக்கும் பலருக்கு இந்தப் போராட்டங்கள் முழுசாகப் புரியவில்லை. ஒன்றுகூடும் உரிமை இருக்கிறது என்பதை ஏற்கிறார்கள். ஆனால் பிரான்ஸ், இத்தாலி மாதிரி சுவிஸில் நிலைமை மோசம் இல்லை என்கிறார்கள். அனுமதி இல்லாத போராட்டமும் வன்முறையும் தவறு என்று பாசலைச் சேர்ந்த ஓர் இளம் அரசியல்வாதி சொல்கிறார். அப்படிச் செய்தால் மற்ற தலைமுறையினர் இளைஞர்களை இன்னும் ஒதுக்கிவிடுவார்கள் என்பது அவர் கவலை. அமர்வை ஏற்பாடு செய்யும் இன்னொரு இளம் பெண்ணோ, சுவிஸ் இளைஞர்களுக்கும் கோபப்பட உரிமை உண்டு என்கிறார். காலநிலை மாற்றம் எல்லோரையும் பாதிக்கும் என்பது அவர் வாதம்.
போராடாதவர்களுக்கும் கவலைகள் உண்டு. காலநிலை மாற்றம், செயற்கை நுண்ணறிவு (AI), வயதானவர்கள் அதிகரிப்பது, எதிர்காலத்தில் என்ன வேலை கிடைக்கும் என்ற பயம் எல்லாம் அவர்களை வாட்டுகின்றன. இளைஞர்களுக்கு உதவும் சுவிஸ் அமைப்பான Pro Juventute சொல்வதுபடி, 10 பேரில் 3 பேர் எதிர்காலத்தை நம்பிக்கையோடு பார்க்கவில்லை.
அமர்வின் முடிவில் இளைஞர்கள் தங்கள் கோரிக்கைகளை மேலவைத் தலைவர் ஸ்டெபான் எங்லரிடம் (Stefan Engler) கொடுப்பார்கள். அவை நிறைவேறுமா என்பது அரசியல்வாதிகள் கையில் இருக்கிறது. 35 ஆண்டுகளாக நடக்கும் இந்த அமர்வில் இருந்து ஒன்பது முறைதான் நாடாளுமன்றத்தில் முன்மொழிவு வந்திருக்கிறது.
மூலம்: SRF
புகைப்படம்: Matthew Larsen / Unsplash
