வேலைப் பயிற்சி (Lehre) பெறும் இளைஞர்களுக்கு 6 வாரம் விடுமுறை கொடுக்கும் திட்டத்தை நிராகரிக்க வேண்டும் என்று சுவிஸ் நாடாளுமன்ற மேலவையின் குழு ஒன்று பரிந்துரைத்துள்ளது. இந்தத் தகவலை நாடாளுமன்ற அலுவலகம் வெள்ளிக்கிழமை அறிவித்தது.
இப்போதைய சட்டப்படி ஊழியர்களுக்கு ஆண்டுக்கு 4 வாரம் விடுமுறை உண்டு. 20 வயதுக்குக் கீழ் உள்ளவர்களுக்கு 5 வாரம். முதலாளிகள் விரும்பினால் இதைவிட அதிகமாகவும் கொடுக்கலாம். பெர்ன் (Bern) மாநிலத்தைச் சேர்ந்த சமூக ஜனநாயகக் கட்சி (SP) மேலவை உறுப்பினர் ஃப்ளாவியா வாசர்ஃபாலன் (Flavia Wasserfallen) இதை 6 வாரமாக உயர்த்தச் சொல்லி கோரிக்கை (Motion) வைத்திருந்தார்.
கல்வி, அறிவியல், கலாசாரத்தைப் பார்க்கும் மேலவைக் குழுவில் பெரும்பாலானோர் இதை ஏற்கவில்லை. விடுமுறை என்பது ஒரு பயிற்சி இடத்தை கவர்ச்சியாக்கும் பல விஷயங்களில் ஒன்றுதான் என்கிறார்கள். வேலை நிலைமைகளை முடிவு செய்வது முதலாளிகளின் பொறுப்பு என்றும், இதில் சட்டம் தேவையில்லாமல் தலையிடக் கூடாது என்றும் சொல்கிறார்கள். சுவிஸ் மத்திய அரசும் (Bundesrat) இதை வேண்டாம் என்றே கூறுகிறது.
குழுவில் சிறுபான்மையினர் வேறு கருத்தில் உள்ளனர். கூடுதல் விடுமுறை கொடுப்பது தொழிற்பயிற்சிக்குக் கொடுக்கும் மதிப்பு என்றும், பயிற்சி இளைஞர்களுக்கு நல்ல வேலை நிலைமை கிடைக்கும் என்றும் அவர்கள் சொல்கிறார்கள். அடுத்து மேலவை முழுமையாக இதில் முடிவெடுக்கும். அங்கும் நிராகரிக்கப்பட்டால் இந்தத் திட்டம் அத்துடன் முடிந்துவிடும்.
மூலம்: SRF
புகைப்படம்: Andreas M / Unsplash
