சுவிஸ் வங்கிகளில் புதிதாக முதலீடு செய்யப்படும் பணத்தில் கிட்டத்தட்ட பாதி, “நிலையான முதலீட்டு நிதிகளுக்கு” (sustainable funds) போகிறது. சாதாரண நிதிகளை விட இவற்றையே மக்கள் அதிகம் தேர்ந்தெடுக்கிறார்கள்.
இந்த நிதிகளில் உள்ள மொத்தப் பணம் இப்போது 1,400 பில்லியன் பிராங்க். இதுவரை இல்லாத உச்சம் இது. லூசேர்ன் (Luzern) உயர்கல்வி நிறுவனம் நடத்திய ஆய்வில் இது தெரியவந்தது. அமெரிக்காவில் டிரம்ப் ஆட்சியில் காலநிலை பாதுகாப்புக்கு அழுத்தம் அதிகம். அங்கே முதலீட்டாளர்கள் இப்படிப்பட்ட முதலீட்டைக் குறைத்துவிட்டார்கள். சுவிஸில் அப்படி நடக்கவில்லை.
இந்த நிதிகள் ஆயுதம், புகையிலை, நிலக்கரி போன்ற துறைகளைத் தவிர்க்கின்றன. சுற்றுச்சூழல், தொழிலாளர் நிலைமை, மனித உரிமை, நேர்மையான நிர்வாகம் ஆகியவற்றில் நல்ல பெயர் எடுத்த நிறுவனங்களையே தேர்ந்தெடுக்கின்றன. சிலவற்றில் பணம் நேரடியாக சூரிய, காற்று மின்சாரம் போன்ற திட்டங்களுக்கும் ஏழை நாடுகளின் மருத்துவ சேவைக்கும் போகிறது.
“இவற்றில் கட்டணம் அதிகம்” என்று முன்பு சொல்வார்கள். இப்போது அது பொருந்தாது. போட்டி அதிகரித்ததால் செலவு குறைந்துவிட்டது. “லாபம் குறைவு” என்ற பேச்சும் சரியில்லை என்கிறது சுவிஸ் நிலையான நிதி அமைப்பு (Swiss Sustainable Finance). சராசரியாகப் பார்த்தால் இரண்டிலும் கிடைக்கும் லாபம் கிட்டத்தட்ட ஒன்றுதான்.
மூலம்: RSI
புகைப்படம்: Towfiqu barbhuiya / Unsplash
