சவுதி அரேபியாவின் தலைநகர் ரியாத்தில் உள்ள கிங் காலித் சர்வதேச விமான நிலையத்தில் ஒக்டோபர் 8ஆம் திகதி இடம்பெற்ற சம்பவத்தைத் தொடர்ந்து, தமது விமான நிறுவனத்தின் விமானி ஒருவர் உயிரிழந்துள்ளதாக அந்நாட்டின் தேசிய விமான நிறுவனமான சவுதியா (Saudia) அறிவித்துள்ளது.
ஒக்டோபர் 9ஆம் திகதி வெளியிட்ட இரங்கல் அறிவிப்பில், உயிரிழந்தவர் கப்டன் ஹமூத் அலி அல்-கல்தாமி (Hamoud Ali Alkalthami) என விமான நிறுவனம் அடையாளம் வெளியிட்டுள்ளது.
“2026 ஒக்டோபர் 8ஆம் திகதி வியாழக்கிழமை, ரியாத்தில் உள்ள கிங் காலித் சர்வதேச விமான நிலையத்தில் இடம்பெற்ற சம்பவத்தில் உயிரிழந்த கப்டன் ஹமூத் அலி அல்-கல்தாமியின் மறைவு எமக்கு ஆழ்ந்த துயரத்தை ஏற்படுத்தியுள்ளது” என சவுதியா நிறுவனம் தெரிவித்துள்ளது.
தேசிய விமான நிறுவனத்தில் அவர் தனது பணிக்காலம் முழுவதும் ஆற்றிய பங்களிப்புகளையும், சக பணியாளர்கள் மத்தியில் அவர் ஏற்படுத்திய தாக்கத்தையும் நிறுவனம் நினைவுகூர்ந்துள்ளது. அத்துடன், அவரது குடும்பத்தினர், உறவினர்கள் மற்றும் சக பணியாளர்களுக்கும் இரங்கல் தெரிவித்துள்ளது.
விமான நிலையத்தில் இரு தாக்குதல்கள்
ஒக்டோபர் 8ஆம் திகதி கிங் காலித் சர்வதேச விமான நிலையத்தில் இரு தாக்குதல்கள் இடம்பெற்றதாகவும், அவற்றில் மூன்று சவுதி பிரஜைகள் உயிரிழந்ததுடன் மேலும் பலர் காயமடைந்ததாகவும் சவுதி அரேபியாவின் சிவில் விமானப் போக்குவரத்து பொது அதிகாரசபை தெரிவித்துள்ளது.
ஒரு தாக்குதல் விமான நிலையத்தின் உட்கட்டமைப்பு வசதிகளை இலக்காகக் கொண்டதாகவும், மற்றைய தாக்குதல் சவுதியா விமான நிறுவனத்தின் விமானம் ஒன்றைத் தாக்கியதாகவும் அதிகாரசபை குறிப்பிட்டுள்ளது.
இதற்கிடையில், பாலிஸ்டிக் ஏவுகணை மூலம் விமான நிலையத்தை இலக்காகக் கொண்டதாக யேமனின் ஹூதி கிளர்ச்சியாளர்கள் பொறுப்பேற்றுள்ளனர்.
விமான நிலைய முனையத்தில் நிறுத்தப்பட்டிருந்த சவுதியா விமானம் ஒன்று தீப்பற்றி கடுமையாகச் சேதமடைந்ததாக ரொய்ட்டர்ஸ் செய்தி நிறுவனம் தெரிவித்திருந்தது. சம்பவம் இடம்பெற்றபோது விமானத்தில் பயணிகள் இருந்ததாகத் தகவல் இல்லை.
எனினும், கப்டன் ஹமூத் அலி அல்-கல்தாமி உயிரிழந்ததற்கான துல்லியமான காரணம் மற்றும் சம்பவத்தின் முழுமையான சூழ்நிலைகள் இதுவரை வெளியிடப்படவில்லை.
