இலங்கையில் VIP பாதுகாப்பு தொடர்பாக அண்மையில் ஊடகங்களில் வெளியான பட்டியலில் இடம்பெற்றுள்ள அனைத்து நபர்களுக்கும் தற்போது பொலிஸ் பாதுகாப்பு வழங்கப்படவில்லை என்று அமைச்சரவைப் பேச்சாளரும் அமைச்சருமான டாக்டர் நளிந்த ஜயதிஸ்ஸ தெரிவித்துள்ளார்.
அமைச்சரவை முடிவுகளை அறிவிக்கும் வாராந்த ஊடக சந்திப்பில் செய்தியாளர் ஒருவர் எழுப்பிய கேள்விக்குப் பதிலளித்த அவர், VIP பாதுகாப்புப் பிரிவின் மூத்த பிரதி பொலிஸ் மா அதிபர் (Senior DIG), பொலிஸ் மா அதிபரிடம் (IGP) சமர்ப்பித்துள்ள அறிக்கையில், ஊடகங்களில் பெயர் குறிப்பிடப்பட்டிருந்த சிலருக்கு தற்போது VIP பாதுகாப்பு வழங்கப்படவில்லை என்று குறிப்பிடப்பட்டுள்ளதாக தெரிவித்தார்.
தற்போது VIP பாதுகாப்பு பெறாதவர்களாக அவர் குறிப்பிடப்பட்டவர்கள்:
- முன்னாள் சபாநாயகர் அசோக ரண்வல
- மொஹமட் ரிஸ்வி சாலி
- சரத் குமார
- அஜித் சாந்த பிரியதர்ஷன
- ருவன் விஜேவீர
- திலங்க யு. கமகே
- சுனில் பியன்வில
- தினேஷ் ஹேமந்த
- ரஞ்சித் மத்தும பண்டார
- எச்.எல். தர்மசேன
- கலகொட அத்தே ஞானசார தேரர்
கடந்த வாரம் வெளியான ஒரு பத்திரிகைச் செய்தியில், 13 அரசியல்வாதிகள் மற்றும் மேலும் சிலர், ஏனைய முக்கிய பிரமுகர்களுக்கான பொலிஸ் பாதுகாப்பு குறைக்கப்பட்ட பின்னரும் தொடர்ந்து VIP பாதுகாப்பு பெற்று வருவதாககூறப்பட்டிருந்த நிலையில், அதற்கு பதிலளிக்கும் வகையிலேயே அமைச்சர் இந்த விளக்கத்தை வழங்கினார்.
மேலும், வடக்கு மற்றும் கிழக்கு மாகாணங்களைச் சேர்ந்த தற்போதைய மற்றும் முன்னாள் சில நாடாளுமன்ற உறுப்பினர்களுக்கு, அரச புலனாய்வு சேவை (State Intelligence Service) மேற்கொள்ளும் அச்சுறுத்தல் மதிப்பீட்டின் அடிப்படையில் இன்னும் பொலிஸ் பாதுகாப்பு வழங்கப்பட்டு வருவதாகவும் அவர் தெரிவித்தார்.
பொலிஸ் சுற்றறிக்கை இலக்கம் 2687/2020-ன் படி, பொலிஸ் பாதுகாப்பு கோரும் நபர் முதலில் விண்ணப்பிக்க வேண்டும். அதன் பின்னர், அரச புலனாய்வு சேவை அச்சுறுத்தல் மதிப்பீட்டை மேற்கொள்கிறது. அதன் அடிப்படையில், பொதுமக்கள் பாதுகாப்பு அமைச்சின் செயலாளர் தலைமையிலான குழு VIP பாதுகாப்பு வழங்க வேண்டுமா என்பது குறித்து பரிந்துரைகளை வழங்கும் என அமைச்சர் விளக்கமளித்தார்.
புலனாய்வு மதிப்பீடுகள் மற்றும் நடைமுறைகளின் அடிப்படையிலேயே பொலிஸ் பாதுகாப்பு வழங்கப்படுவதாகவும், எந்த நபருக்கும் தன்னிச்சையாக VIP பாதுகாப்பு வழங்கப்படுவதில்லை என்றும் அமைச்சர் நளிந்த ஜயதிஸ்ஸ வலியுறுத்தினார்.
