பட்டப்படிப்பு முடித்த இளைஞர்களுக்கு சுவிஸில் வேலை கிடைப்பது கடினமாகி வருகிறது. செயற்கை நுண்ணறிவு (AI) தான் இதற்குக் காரணம் என்ற பயம் இளையோரிடம் அதிகரித்துள்ளது. சுவிஸ் தொலைக்காட்சியின் “Club” விவாத நிகழ்ச்சியில் இன்ஃப்ளூயன்சர் சிமோனா கொப்போலா (Simona Coppola) இதைப் பேசினார்.
கொப்போலாவுக்கு 25 வயது. சூரிக் (Zürich) பல்கலைக்கழகத்தில் சட்டம் படிக்கிறார். மார்ச் மாதம் இதைப் பற்றி அவர் போட்ட TikTok வீடியோ பெரிய பேச்சானது. நிகழ்ச்சிக்காக தன்னைப் பின்தொடர்பவர்களிடம் கேட்டார். இரண்டே நாளில் 1000-க்கும் மேற்பட்ட பதில்கள் வந்தன. பலர் எல்லா இடத்திலும் விண்ணப்பித்தும் நிராகரிப்பு மட்டுமே கிடைப்பதாகச் சொன்னார்கள்.
இப்போது விண்ணப்பக் கடிதத்தையே AI வைத்து எழுதுகிறார்கள். அதை AI படிக்கிறது. நிராகரிப்புக் கடிதத்தையும் AI தான் அனுப்புகிறது. AI எழுதியது போலத் தெரியக்கூடாது என்பதற்காக, ஒரு மாணவி வேண்டுமென்றே சில தவறான வாக்கியங்களை தன் கடிதத்தில் சேர்த்தாராம்.
வேலை தேடும் இணையதளம் jobs.ch கணக்குப்படி, 2025-இல் புதிதாகப் படித்து முடித்தவர்களுக்கான வேலை அறிவிப்புகள் முன்பை விடக் கிட்டத்தட்ட மூன்றில் ஒரு பங்கு குறைவு. ஆனால் இதற்கு AI மட்டுமே காரணம் என்று உறுதியாகச் சொல்ல முடியாது.
சில நிறுவனங்கள் AI இருப்பதால் பயிற்சியாளர்களையும் புதியவர்களையும் எடுப்பதில்லை. பின்னாளில் அனுபவமுள்ள ஊழியர்கள் கிடைக்காமல் போகலாம் என்று ஒருவர் எச்சரித்தார். எல்லா மூத்த அதிகாரிகளும் ஒரு காலத்தில் புதியவர்கள்தான் என்கிறார் கொப்போலா. தானும் AI படிப்புகள் படித்தாலும், எப்போதும் ஒரு அடி பின்னால் இருப்பது போலத் தோன்றுவதாகச் சொல்கிறார். இளையோருக்கு தங்கள் திறமையைக் காட்ட ஒரு வாய்ப்பு தர வேண்டும் என்பதே அவர் கோரிக்கை.
மூலம்: SRF
புகைப்படம்: Rodeo Project Management Software / Unsplash





