ஆண்டிபயாட்டிக் அச்சம்: பிரேசில் இறைச்சிக்கு சுவிட்சர்லாந்து தடை

செப்டம்பர் தொடக்கம் முதல் பிரேசிலில் இருந்து மாட்டிறைச்சி மற்றும் கோழி இறைச்சியை இறக்குமதி செய்ய சுவிட்சர்லாந்து தடை விதித்துள்ளது. இதன் காரணமாக இறைச்சி விலை அதிகரிக்கும் வாய்ப்பும் இருப்பதாக சுடழடிக்காட்டப்படுகிறது.

என்ன நடந்தது?

2026 செப்டம்பர் தொடக்கத்தில், ஆண்டிபயாட்டிக் மருந்துகள் பயன்படுத்தப்படுவது தொடர்பான சந்தேகங்களின் காரணமாக, பிரேசிலில் இருந்து மாட்டிறைச்சி மற்றும் கோழி இறைச்சியை இறக்குமதி செய்ய ஐரோப்பிய ஒன்றியம் தடை விதித்தது.

இந்த இறக்குமதித் தடை சுவிட்சர்லாந்துக்கும் பொருந்துமா?

ஆம். சுவிட்சர்லாந்தும் இந்தத் தடையால் பாதிக்கப்பட்டுள்ளது. சுவிஸ் உணவுப் பாதுகாப்பு மற்றும் கால்நடை மருத்துவ அலுவலகம் (BLV), SRF-இன் நுகர்வோர் நிகழ்ச்சியான «Espresso»விடம் இதை உறுதிப்படுத்தியுள்ளது.

செப்டம்பர் 3ஆம் தேதி முதல் பிரேசிலில் இருந்து கோழி மற்றும் மாட்டிறைச்சியை சுவிட்சர்லாந்தும் இறக்குமதி செய்ய முடியாது.

தடைக்கான காரணம் என்ன?

ஐரோப்பிய ஒன்றியத்தில், கால்நடைகளின் வளர்ச்சி அல்லது உற்பத்தித் திறனை அதிகரிப்பதற்காக ஆண்டிபயாட்டிக் மருந்துகளை வழங்குவது தடைசெய்யப்பட்டுள்ளது.

மேலும், மனிதர்களின் உயிரைக் காப்பாற்றுவதற்கு மிகவும் முக்கியமான சில ஆண்டிபயாட்டிக்குகள், அதாவது ‘Reserve Antibiotics’ எனப்படும் காப்பு ஆண்டிபயாட்டிக்குகள், கால்நடைகளுக்கு பயன்படுத்தப்படுவதற்கே அனுமதி இல்லை.

ஆண்டிபயாட்டிக் எதிர்ப்புத் தன்மை (Antibiotic Resistance) ஏற்படுவதைத் தடுப்பதே இதன் நோக்கமாகும்.

பிரேசிலில் கால்நடை வளர்ப்பில் ஆண்டிபயாட்டிக் பயன்பாடு தொடர்பான ஐரோப்பிய ஒன்றியத்தின் விதிமுறைகளை அதன் தயாரிப்புகள் பூர்த்தி செய்கின்றன என்பதற்கான போதுமான உத்தரவாதங்களை பிரேசில் இதுவரை வழங்கவில்லை. இதனால் ஐரோப்பிய ஒன்றியம் இறக்குமதித் தடையை விதித்துள்ளது. சுவிட்சர்லாந்தும் அதே நடவடிக்கையைப் பின்பற்றியுள்ளது.

நுகர்வோருக்கு இதன் தாக்கம் என்ன?

பிரேசில் உலகின் மிகப்பெரிய மாட்டிறைச்சி மற்றும் கோழி இறைச்சி ஏற்றுமதியாளர்களில் ஒன்றாகும்.

இருப்பினும், சுவிட்சர்லாந்து பிரேசிலில் இருந்து அதிக அளவில் மாட்டிறைச்சியை இறக்குமதி செய்வதில்லை.

இறைச்சித் துறையின் அமைப்பான Proviande தெரிவிப்பதன்படி, சுவிட்சர்லாந்தில் பயன்படுத்தப்படும் மாட்டிறைச்சியில் கிட்டத்தட்ட 80 சதவீதம் உள்நாட்டிலேயே உற்பத்தி செய்யப்படுகிறது.

மாட்டிறைச்சி இறக்குமதிகளில் பெரும்பகுதி ஜெர்மனி மற்றும் ஆஸ்திரியாவிலிருந்து வருகிறது.

எனவே, கடைகளில் இந்த இறக்குமதித் தடையின் தாக்கம் பெரிதாகத் தெரியாது என எதிர்பார்க்கப்படுகிறது.

கோழி இறைச்சியின் நிலைமை என்ன?

சுவிட்சர்லாந்தில் பயன்படுத்தப்படும் கோழி இறைச்சியில் சுமார் 40 சதவீதம் இறக்குமதி செய்யப்படுகிறது.

அந்த இறக்குமதியில் மூன்றில் ஒரு பங்கு பிரேசிலில் இருந்து வருகிறது.

இது புறக்கணிக்க முடியாத அளவு என்றாலும், தற்போதைய நிலைமையை சமாளிக்க முடியும் என Proviande தெரிவித்துள்ளது.

எனவே, கோழி அல்லது இறைச்சிக்கு தட்டுப்பாடு ஏற்படும் என எதிர்பார்க்கவில்லை என்றும் அந்த அமைப்பு கூறுகிறது.

Migros மற்றும் Coop என்ன கூறுகின்றன?

Coop நிறுவனத்தைப் பொறுத்தவரை, இந்த இறக்குமதித் தடை பிரேசிலில் இருந்து இறக்குமதி செய்யப்படும் சில குறைந்த எண்ணிக்கையிலான பொருட்களையே பாதிக்கிறது. அவற்றுக்கு மாற்று பொருட்கள் இருப்பதாக Coop தெரிவித்துள்ளது.

Migros நிறுவனமும் இதேபோன்ற தகவலை வழங்கியுள்ளது.

பிரேசில் இறக்குமதி தடையால் சில Convenience Food பொருட்கள், குறிப்பாக சிக்கன் நகெட்ஸ் போன்றவைபாதிக்கப்பட்டுள்ளன. அவற்றுக்கு பதிலாக தற்போது ஐரோப்பிய ஒன்றிய நாடுகளில் இருந்து பொருட்களை இறக்குமதி செய்ய Migros நடவடிக்கை எடுத்துள்ளது.