இலங்கையில் HIV தொற்றால் பாதிக்கப்படுவோரின் எண்ணிக்கை ஆண்டுதோறும் அதிகரித்து வருவதாக சமூக நிபுணத்துவ வைத்தியர் டாக்டர் சத்யா ஹேரத் எச்சரித்துள்ளார்.
நேற்று (13) சுகாதார அமைச்சில் நடைபெற்ற ஊடக சந்திப்பில் பேசிய அவர், கொழும்பு மற்றும் கம்பஹா மாவட்டங்களில் அதிகளவிலான HIV தொற்றாளர்கள் பதிவாகி வருவதுடன், ஆண்களிடையே இந்தத் தொற்று அதிகமாகக் காணப்படுவதாகவும் தெரிவித்தார்.
பாதுகாப்பற்ற பாலியல் உறவுகளே HIV பரவலுக்கான முக்கிய காரணம் எனக் குறிப்பிட்ட அவர், பாதுகாப்பற்ற பாலியல் நடத்தை, போதைப்பொருள் ஊசி செலுத்த பயன்படுத்தப்படும் ஊசிகள், சிரிஞ்சுகள் மற்றும் பிற கருவிகளைப் பகிர்ந்து பயன்படுத்துவதும் தொற்று பரவுவதற்கு காரணமாக இருப்பதாக விளக்கினார்.
HIV நோயை முழுமையாக குணப்படுத்த முடியாது என்றும், தொற்றுக்குள்ளானவர்கள் நீண்டகாலம் தொடர்ச்சியான மருத்துவ சிகிச்சையைப் பெற வேண்டியிருக்கும் என்றும் டாக்டர் ஹேரத் தெரிவித்தார். குறிப்பாக, இளம் வயதிலேயே HIV தொற்று ஏற்பட்டவர்களுக்கு வாழ்நாள் முழுவதும் மருந்து மற்றும் மருத்துவக் கண்காணிப்பு அவசியம் என்றும் அவர் கூறினார்.
HIV பரவலைக் கட்டுப்படுத்தும் நோக்கில், கொழும்பு மற்றும் கம்பஹா மாவட்டங்களில் HIV, பாலியல் தொடர்பான தொற்றுநோய்கள் (STIs) மற்றும் ஹெபடைட்டிஸ் தொடர்பான சிறப்பு நடமாடும் மருத்துவ சேவைஆரம்பிக்கப்பட்டுள்ளது. சுகாதார அமைச்சின் தேசிய பாலியல் நோய்/எய்ட்ஸ் கட்டுப்பாட்டு திட்டம் இந்த முன்னோடி திட்டத்தை கடந்த ஜனவரி மாதம் தொடங்கியுள்ளது.
இந்தத் திட்டத்தின் கீழ், நோயாளிகளின் சம்மதம் மற்றும் தனியுரிமை முழுமையாகப் பாதுகாக்கப்பட்ட நிலையில் இலவச பரிசோதனை மற்றும் மருத்துவ சேவைகள் வழங்கப்படுகின்றன. பரிசோதனை அறிக்கைகளும் இரகசியமாக வைக்கப்படுகின்றன. தொற்று உறுதி செய்யப்பட்டால், நோயாளிகளுக்கு இலவச மருத்துவ ஆலோசனையும் சிகிச்சையும் வழங்கப்படுகிறது.
உலகளவில் HIV பரவல் போக்குகள் மாறுபட்டாலும், இலங்கையில் 2023ஆம் ஆண்டிலிருந்து பதிவாகும் HIV தொற்றாளர்களின் எண்ணிக்கை படிப்படியாக அதிகரித்து வருவதாகவும், அதிக மக்கள் தொகை கொண்ட கொழும்பு மற்றும் கம்பஹா மாவட்டங்களிலேயே மற்ற பகுதிகளை விட அதிகமான தொற்றாளர்கள் பதிவாகியுள்ளதாகவும் டாக்டர் சத்யா ஹேரத் தெரிவித்தார்.
