கனடாவின் முக்கிய உள்கட்டமைப்பு மற்றும் ஆற்றல் திட்டங்களுக்கு விரைவாக ஒப்புதல் அளிப்பதற்காக பிரதமர் மார்க் கார்னியின் அரசு கொண்டுவந்துள்ள மசோதா C-39 சட்டமாக்கப்பட்டால், சுற்றுப்புறச்சூழலுக்குச் சரிசெய்ய முடியாத பேரழிவு ஏற்படும் என்று கனடாவின் 50-க்கும் மேற்பட்ட முன்னணி அறிவியலாளர்களும் பேராசிரியர்களும் எச்சரித்துள்ளனர்.
‘ராயல் சொசைட்டி ஆஃப் கனடா’ அமைப்பைச் சேர்ந்த 56 அறிவியலாளர்கள் வியாழக்கிழமையன்று ஒரு திறந்த மடலை வெளியிட்டுள்ளனர்.
அதில், மசோதா C-39-இல் உள்ள குறிப்பிட்ட 6 சரத்துகளில் திருத்தங்கள் செய்யப்பட வேண்டும் அல்லது அவற்றை முற்றிலும் நீக்க வேண்டும் என்று வலியுறுத்தியுள்ளனர்.
“தற்போதுள்ள மசோதா, கனடாவில் இயற்கை, நீர் மற்றும் காற்றைப் பாதுகாக்க நடைமுறையிலுள்ள பல சுற்றுச்சூழல் விதிகளைப் புறந்தள்ளுகிறது.
பொருளாதார வளர்ச்சிக்காக எதிர்கால சந்ததியின் இயற்கை வளங்களை நாம் கடன் வாங்குகிறோம்” என இங்கிலாந்து கொலம்பியா பல்கலைக்கழகத்தின் விலங்கியல் துறை பேராசிரியர் டாக்டர் சாரா ஓட்டோ குறிப்பிட்டுள்ளார்.
இதேவேளை, எதிர்க்கட்சிகள் மற்றும் தொழிற்சங்கங்கள் இந்த மசோதாவுக்குக் கடும் எதிர்ப்பு தெரிவித்து வருகின்றன. தொழிற்சங்கங்களின் வேலைநிறுத்த உரிமையைப் பறிக்கும் வகையில் கனடா தொழிலாளர் சட்டத்தில் மாற்றங்கள் செய்யப்படுவதாகத் தொழிலாளர் அமைப்புகள் குற்றம் சாட்டுகின்றன.
இந்த மசோதாவை ஆராய அமைக்கப்பட்ட நாடாளுமன்ற சிறப்புக்குழுவில், எதிர்க்கட்சிகளின் குரல்களுக்கு போதிய வாய்ப்பளிக்கப்படவில்லை என புதிய ஜனநாயகக் கட்சி குற்றம் சாட்டியுள்ளது.
எனினும், இந்த மசோதா சுற்றுச்சூழல் பாதுகாப்புத் தரங்களையோ அல்லது பழங்குடியின மக்களின் உரிமைகளையோ எவ்வகையிலும் குறைக்காது என்றும், மதிப்பீட்டுச் செயல்முறைகள் மட்டுமே விரைவுபடுத்தப்படும் என்றும் சுற்றுச்சூழல் அமைச்சர் ஜூலி டாப்ரஸினின் அலுவலகம் விளக்கம் அளித்துள்ளது.
