சுவிஸ் முழுவதும் உள்ள அல்டி (Aldi) கடைகளில் விற்கப்பட்ட சிக்கன் துண்டுகளில் லிஸ்டீரியா (Listeria) என்ற கிருமி கண்டுபிடிக்கப்பட்டுள்ளது. இதனால் அந்தப் பொருட்களைச் சாப்பிட வேண்டாம் என அரசு எச்சரித்துள்ளது.
உணவுப் பாதுகாப்பைக் கண்காணிக்கும் சுவிஸ் அரசு அலுவலகம் (BLV) இந்த எச்சரிக்கையை வெளியிட்டது. அல்டி நிறுவனம் உடனே இந்தப் பொருட்களைக் கடைகளிலிருந்து எடுத்துவிட்டது. வாங்கியவர்களிடமிருந்து திரும்பப் பெறவும் தொடங்கியுள்ளது.
பாதிக்கப்பட்டவை, சிறு துண்டுகளாக வெட்டிய கோழி நெஞ்சுக்கறி (Mini-Hähnchenbrust-Filetstücke). மூன்று வகைகள் உள்ளன:
- Mini-Classic
- Mini-Curry
- Mini-Paprika
பாக்கெட்டில் உள்ள காலாவதி தேதி 14.11.2026, 17.11.2026, 20.11.2026, 24.11.2026 அல்லது 30.11.2026 என இருந்தால் அது பாதிக்கப்பட்டது.
உடல்நலம் நன்றாக இருப்பவர்களுக்கு இந்தக் கிருமி பெரும்பாலும் லேசான பாதிப்பையே தரும். சிலருக்கு எந்த அறிகுறியும் இருக்காது. ஆனால் பிறந்த குழந்தைகள், சிறு பிள்ளைகள், முதியவர்கள், கர்ப்பிணிகள், நோய் எதிர்ப்புச் சக்தி குறைந்தவர்களுக்கு இது ஆபத்தாகலாம். சிலநேரம் உயிருக்கே ஆபத்து வரலாம்.
மூலம்: SRF
புகைப்படம்: Ricardo Gomez Angel / Unsplash
