டிசினோ மாநிலத்தில் (Ticino) அட்ரியா கட்டுமான நிறுவனத்தின் (Adria Costruzioni) வழக்கு இன்னும் முடியவில்லை. நிறுவனம் திவாலாகி 10 ஆண்டுகளுக்கு மேலாகியும், பாதியில் நின்ற கட்டடங்கள் அங்கே அப்படியே இருக்கின்றன.
ப்ரெகாசோனா (Pregassona) பகுதியில் பாதி கட்டி முடித்த பெரிய கட்டடம் ஒன்று நிற்கிறது. மக்கள் அதை “அரக்கக் கட்டடம்” என்று அழைக்கிறார்கள். நோவாசானோவில் (Novazzano) திட்டமிட்ட குடியிருப்புத் திட்டம் தொடங்கிய கொஞ்ச நாளிலேயே நின்றுவிட்டது.
இந்த வழக்கில் ஃபிலிப்போ காம்ப்ரியாவுக்கும் (Filippo Cambria) அவர் தந்தைக்கும் முதல் நீதிமன்றம் 5 ஆண்டுகளுக்கு மேல் சிறைத் தண்டனை விதித்தது. மோசடி, பணத்தைத் தவறாகப் பயன்படுத்தியது ஆகியவை குற்றச்சாட்டுகள். ஆனால் இந்தத் தீர்ப்பு இன்னும் இறுதியானது அல்ல.
இப்போது ப்ரோமோசுவிஸ் (Promoswiss) என்ற கட்டுமான நிறுவனத்தோடு அவர் பெயர் மீண்டும் அடிபடுகிறது. இந்த நிறுவனமும் திவாலாகிவிட்டது. அதிகாரப்பூர்வமாக அவர் நிர்வாகத்தில் இல்லை. ஆனால் வேலைத்தளங்களில் அவரை அடிக்கடி பார்த்ததாக தொழிலாளர்கள் சொல்கிறார்கள். சம்பளம் வரவில்லை, ஒப்பந்தத்தை விடக் குறைவாகக் கொடுத்தார்கள் என்றும் புகார் செய்கிறார்கள். யூனியா தொழிற்சங்கம் (Unia) பல வழக்குகளைப் பார்த்தது. அவருடைய வழக்கறிஞர் இதை மறுக்கிறார். அவருக்கு நிறுவனத்தில் எந்தப் பொறுப்பும் இல்லை என்கிறார்.
இவானும் கிளாடின் காலோவும் (Ivo, Claudine Calò) 2015-ல் அர்பேடோவில் (Arbedo) வீடு கட்ட அட்ரியாவுக்கு 270,000 பிராங்க் முன்பணம் கொடுத்தார்கள். வேலை தொடங்க வேண்டிய நாளிலேயே நிறுவனம் சரிந்தது. பணம் திரும்பக் கிடைக்க வேண்டும் என்று நீதிமன்றம் சொன்னது. ஆனால் இன்றுவரை கிடைக்கவில்லை. வீட்டை முடிக்க மீண்டும் கடன் வாங்கினார்கள். இப்போது இத்தாலியில் வாழ்கிறார்கள்.
தீர்ப்பு இறுதியாகும் வரை தண்டனை பெற்றவர்கள் சுதந்திரமாக வேலை செய்யலாம் என்று வழக்கறிஞர் கோரான் மசுக்கெல்லி (Goran Mazzucchelli) விளக்குகிறார். மீண்டும் குற்றம் செய்யும் ஆபத்து இருந்தால் தொழிலைத் தடை செய்ய நீதிபதிக்கு அதிகாரம் உண்டு. ஆனால் அது தானாக நடக்காது.
மூலம்: RSI
புகைப்படம்: Jan Huber / Unsplash
