பகல் குறுகும் குளிர்காலத்தில் வீடு புகுந்து திருடுவது அதிகரிக்கிறது. சுவிஸில் சராசரியாக ஒரு நாளைக்கு 128 திருட்டுகள் நடக்கின்றன. ஆர்காவ் மாநிலப் பொலிஸ் (Aargau) இதற்காக “Im Visier” என்ற புதிய பிரசாரத்தை ஆரம்பித்துள்ளது.
வேலை முடிந்து மக்கள் வீடு திரும்புவதற்கு முன் பல வீடுகள் இருட்டாக இருக்கும். வீட்டில் யாரும் இல்லை என்பது திருடர்களுக்கு எளிதாகத் தெரிந்துவிடும். கடந்த ஆண்டு திருட்டுகள் முந்தைய ஆண்டை விட சுமார் 5 சதவீதம் கூடியுள்ளன. பாசல் நகர மாநிலம் (Basel-Stadt), சோலோதுர்ன் (Solothurn), வோ (Vaud) ஆகிய இடங்களில் ஆபத்து அதிகம்.
பெரிய தோட்டமும் நிறைய மரம், செடிகளும் உள்ள தனி வீடுகளைத் திருடர்கள் விரும்புகிறார்கள். செடிகள் மறைவாக இருப்பதால் யாரும் பார்க்காமல் வீட்டுக்குள் நெருங்க முடிகிறது. பூனை வருவதற்கான சின்னக் கதவு வழியாகவும் கதவையோ ஜன்னலையோ திறக்க முடியாதபடி அமைக்க வேண்டும் என்று பொலிஸ் சொல்கிறது.
மிக எளிய வழி, வீட்டில் இருந்தாலும் கதவைப் பூட்டிக்கொள்வது. 5 திருட்டுகளில் ஒன்றில் வீட்டில் ஆட்கள் இருக்கிறார்கள். டைமர் வைத்த விளக்கு, அசைவைக் கண்டுபிடித்து எரியும் வெளி விளக்கு, அலாரம் ஆகியவையும் உதவும். கேமரா வைத்தால் அதைப் பற்றிய அறிவிப்புப் பலகை வேண்டும். சொந்த நிலத்தை மட்டுமே படம் பிடிக்க வேண்டும். கிப் ஜன்னல்களை எப்போதும் மூடி வையுங்கள். நகை, பணம் போன்றவற்றை பாதாள அறையில் (Keller) வைப்பது நல்லது. திருடர்கள் குளியலறையிலும் படுக்கையறையிலும்தான் முதலில் தேடுவார்கள்.
சந்தேகமான ஆட்களையோ கார்களையோ பார்த்தால் அக்கம்பக்கத்தினர் பொலிஸுக்குச் சொல்வது பெரும்பாலும் கைகொடுக்கிறது. ஆனால் மக்களே குழுவாகத் தெருவில் ரோந்து செல்வதை பொலிஸ் ஆதரிக்கவில்லை. அது ஆபத்தான நிலைமைகளுக்கு வழிவகுக்கலாம் என்று எச்சரிக்கிறது.
மூலம்: SRF
புகைப்படம்: Josue Michel / Unsplash
