சுவிஸ் நாடாளுமன்றக் கீழவையின் (Nationalrat) நிதிக் குழு, 2027-ஆம் ஆண்டுக்கான மத்திய அரசின் பட்ஜெட்டை நிராகரிக்கச் சொல்லிப் பரிந்துரைத்துள்ளது. டிசம்பரில் நடக்கும் குளிர்காலக் கூட்டத்தொடரில் இந்த பட்ஜெட் விவாதத்துக்கு வருகிறது.
குழுவில் SVP (வலதுசாரிக் கட்சி), SP (சமூக ஜனநாயகக் கட்சி), பசுமைக் கட்சி ஆகிய மூன்றும் “வேண்டாம்” என்று வாக்களித்தன. ஆனால் மூன்றுக்கும் காரணங்கள் வேறு வேறு.
SVP-க்கு பட்ஜெட்டில் உள்ள இரண்டு விற்பனை வரி (VAT) உயர்வுகள் பிடிக்கவில்லை. ஒன்று, 13-வது மாத AHV ஓய்வூதியத்துக்காக. இதற்கு மக்கள் வாக்கெடுப்பு இந்த மாத இறுதியில் நடக்கிறது. இன்னொன்று, ராணுவத்துக்காக. இதை நாடாளுமன்றம் இன்னும் விவாதிக்கவில்லை. ஆனாலும் மத்திய அரசு (Bundesrat) தன் பட்ஜெட்டில் சேர்த்துவிட்டது. வரியை உயர்த்தாமல், வெளிநாட்டு உதவி, குடியேற்றம், அகதிகள், அரசு ஊழியர் செலவுகளில் இன்னும் குறைக்கலாம் என்கிறது SVP.
SP-யும் பசுமைக் கட்சியும் எதிர் திசையில் நிற்கின்றன. ராணுவத்துக்காக மக்களிடமும் காலநிலைப் பாதுகாப்பிலும் அளவுக்கு மேல் சிக்கனம் காட்டுவதாக அவை சொல்கின்றன. மலிவு வாடகைக்கான அவர்களின் கோரிக்கைகளும் தோற்றுப்போயின.
குழுவின் பரிந்துரையால் உடனே பட்ஜெட் தூக்கி எறியப்படாது. கீழவை முதலில் குழு கொடுத்த 100-க்கும் மேற்பட்ட திருத்தங்களைப் பார்க்கும். இறுதி வாக்கெடுப்பில் நிராகரிக்கப்பட்டால், பட்ஜெட் மீண்டும் மத்திய அரசிடம் திருத்த அனுப்பப்படும். மையக் கட்சியின் உறுப்பினர் ரெட்டோ நாவ்ஸ் (Reto Nause) இதைக் கடுமையாக விமர்சித்தார். நாடு குழப்பத்தை நோக்கிப் போகிறது என்றும், தேர்தல் ஆண்டு நெருங்குவதால்தான் கட்சிகள் இப்படி நடந்துகொள்கின்றன என்றும் அவர் சொல்கிறார்.
மூலம்: SRF
புகைப்படம்: Thiago de Andrade / Unsplash
