சுவிஸ் எல்லைக் காவல் படை, டிசினோ மாநிலத்தில் உள்ள மெண்ட்ரிசியோ (Mendrisio) நகரில் ஒரு புதிய சோதனைத் திட்டத்தைத் தொடங்கியுள்ளது. மூன்று மாதக் குட்டி நாய் “பிளிஸ்” (Bliss)-க்குப் போதைப்பொருளைக் கண்டுபிடிக்கப் பயிற்சி கொடுக்கப்படுகிறது.
பிளிஸ் டச்சு மேய்ப்பர் (Dutch shepherd) இன நாய். இதுவரை எல்லைக் காவலர்கள் பெரும்பாலும் பெல்ஜிய மலினுவா (Malinois) இன நாய்களையே பயன்படுத்தினார்கள். டச்சு இனமும் போதைப்பொருள் கடத்தலைத் தடுக்கச் சரியா என்று பார்ப்பதுதான் இந்தத் திட்டத்தின் நோக்கம். இதை நடத்துவது சுவிஸ் மத்திய சுங்க அலுவலகம் (UDSC). திட்டம் இரண்டு வாரங்களுக்கு முன் தொடங்கியது.
இப்போதைக்குப் பயிற்சி மிகவும் எளிது. ஒளித்து வைத்த பந்தைத் தேட வேண்டும். பெயர் சொல்லிக் கூப்பிட்டால் வர வேண்டும். சில வாரங்களில் வெவ்வேறு வாசனைகளை அடையாளம் காணக் கற்றுக்கொள்ளும். பிறகு அந்த வாசனையைப் போதைப்பொருளோடு இணைத்து, தானாகவே கண்டுபிடிக்கப் பழகும்.
முதலில் நாய்க்கும் பயிற்சியாளருக்கும் இடையே நம்பிக்கை வர வேண்டும். அதனால் பிளிஸ் இப்போது பயிற்சியாளர் லூக்கா ஃபெராரா (Luca Ferrara) வீட்டிலேயே தங்குகிறது. அங்கே அதற்கு யாரும் நுழையாத தனி இடமும் உண்டு.
டச்சு இன நாய்கள் வேலை முடிந்ததும் எளிதாக ஓய்வுக்கு மாறிவிடும் என்று ஃபெராரா சொல்கிறார். பெல்ஜிய நாய்கள் மிகவும் துடிப்பானவை, ஆனால் சும்மா இருக்கும்போது அமைதியாக இருக்க சிரமப்படும். சுவிஸ் சுங்கத்துறையில் சுமார் 100 நாய்கள் வேலை செய்கின்றன. சில போதைப்பொருள், வெடிபொருளைக் கண்டுபிடிக்கின்றன. சில காணாமல் போனவர்களைத் தேடுகின்றன. பிளிஸ் ஒன்றரை ஆண்டுக்குப் பிறகு பணிக்கு வரலாம்.
மூலம்: RSI
புகைப்படம்: Berkay Gumustekin / Unsplash
