எல் நினோ தீவிரம், உரத் தட்டுப்பாடு, தானிய ஏற்றுமதியில் பாதிப்பு ஆகிய காரணிகளால் எதிர்வரும் மாதங்களில் உலகம் பெரும் உணவு நெருக்கடியை எதிர்கொள்ளக்கூடும் என இந்திய வெளியுறவு அமைச்சர் எஸ். ஜெய்சங்கர் எச்சரிக்கை விடுத்துள்ளார்.
தானிய ஏற்றுமதியில் ஏற்படக்கூடிய இடையூறுகள், உரத் தட்டுப்பாடு மற்றும் தீவிரமடையக்கூடிய எல் நினோ காலநிலை மாற்றம் ஆகியவை உலகளாவிய உணவு விநியோகத்தில் கடுமையான பாதிப்புகளை ஏற்படுத்தக்கூடும் என அவர் சுட்டிக்காட்டியுள்ளார்.
தானிய ஏற்றுமதியில் பாதிப்பு ஏற்படும் அபாயம்
உலகளாவிய சவால்கள் குறித்து கருத்துத் தெரிவித்த ஜெய்சங்கர், தானியங்களை ஏற்றுமதி செய்யும் சில முக்கிய நாடுகள் தமது விநியோகங்களை, குறிப்பாக கருங்கடல் பிராந்தியத்தின் ஊடாக அனுப்புவதில் சிக்கல்களை எதிர்கொள்ளக்கூடும் எனக் குறிப்பிட்டார்.
இது உலக சந்தையில் உணவுப் பொருட்களின் கிடைப்பில் மேலும் அழுத்தத்தை ஏற்படுத்தும் எனவும் அவர் தெரிவித்தார்.
உரத் தட்டுப்பாடு மற்றும் எல் நினோ அச்சுறுத்தல்
ரஷ்யா மற்றும் மத்திய கிழக்கு நாடுகள் உள்ளிட்ட முக்கிய உர உற்பத்தியாளர்களின் உற்பத்தி பாதிக்கப்பட்டுள்ளதால், உர விநியோகம் தொடர்பான கவலைகள் அதிகரித்து வருவதாகவும் ஜெய்சங்கர் தெரிவித்துள்ளார்.
இதனுடன் தீவிரமான எல் நினோ காலநிலை நிகழ்வும் இணைந்தால், உலகளாவிய உணவு உற்பத்தி மற்றும் விநியோகத்தில் மேலதிக ஆபத்துகள் ஏற்படக்கூடும் என அவர் எச்சரித்துள்ளார்.
எரிசக்தி, உணவு, உரம் மற்றும் நிதித்துறைகளில் ஒரே நேரத்தில் ஏற்படும் அழுத்தங்கள், உலக நாடுகளுக்கு மிகவும் நெருக்கடியான சூழலை உருவாக்கக்கூடும் எனவும் அவர் குறிப்பிட்டார்.
சர்வதேச நிதிச் சந்தைகளிலும் அழுத்தம்
மோதல்கள் ஏற்படும்போது முதலீடுகள் பொதுவாகப் பாதுகாப்பானதாகக் கருதப்படும் சந்தைகளை நோக்கி நகர்வதுடன், உலகப் பொருளாதாரத்தில் அதிக பாதிப்புக்குள்ளாகக்கூடிய பகுதிகளிலிருந்து வெளியேறுவதாகவும் ஜெய்சங்கர் சுட்டிக்காட்டினார்.
இத்தகைய நிதி நகர்வுகள் ஏற்கனவே பாதிக்கப்பட்டுள்ள நாடுகளுக்கு மேலதிக பொருளாதார அழுத்தத்தை ஏற்படுத்தும் என அவர் தெரிவித்தார்.
மேலும், முக்கிய நாடுகளின் கொள்கைத் தீர்மானங்கள் பிற நாடுகளில் ஏற்படுத்தக்கூடிய சர்வதேச விளைவுகளையும் கருத்தில் கொள்ள வேண்டிய பொறுப்பு அந்த நாடுகளின் கொள்கை வகுப்பாளர்களுக்கு உள்ளதாக அவர் வலியுறுத்தினார்.
பிற நாடுகளுக்கு ஏற்படும் பாதிப்புகள் திட்டமிட்டு உருவாக்கப்பட்டவையா இல்லையா என்பதைப் பொருட்படுத்தாமல், தமது உள்நாட்டுத் தேவைகளுக்கு அப்பால் சென்று, உலகின் ஏனைய நாடுகள் மீதான தாக்கங்களையும் மதிப்பிட வேண்டும் என அவர் கேட்டுக்கொண்டார்.
குறிப்பாக, உலகளாவிய பொருளாதார மற்றும் புவிசார் அரசியல் நிச்சயமற்ற தன்மைகள் அதிகரித்து வரும் சூழலில் இத்தகைய அணுகுமுறை அவசியமானது எனவும் அவர் தெரிவித்துள்ளார்.
