சுவிஸ் நகரங்களில் காலநிலைப் பாதுகாப்பைக் கோரி ஆயிரக்கணக்கானோர் போராட்டம்!

Etwa 2000 Klimademonstrantinnen und -demonstranten, mit und ohne Velos, versammeln sich auf dem Bundesplatz, um auf den Klimawandel aufmerksam machen, unter dem Motto "Keine 50-Grad Sommer", am Freitag, 25. September 2026 in Bern. (KEYSTONE/Alessandro della Valle)

சுவிட்சர்லாந்தில் வரலாறு காணாத வெப்பமான கோடைகாலத்துக்குப் பின்னர், காலநிலை மாற்றத்தைக் கட்டுப்படுத்தவும், காலநிலைப் பாதுகாப்பு நடவடிக்கைகளைத் தீவிரப்படுத்தவும் கோரி வெள்ளிக்கிழமை பல்வேறு நகரங்களில் ஆயிரக்கணக்கான மக்கள் போராட்டங்களில் ஈடுபட்டனர்.

நாடாளுமன்றத்திற்கு முன்பாக பேரணி

தலைநகர் பேர்னில் நாடாளுமன்றத்திற்கு முன்பாகப் போராட்டக்காரர்கள் ஒன்றுகூடி, வெப்ப அலைகள் மற்றும் காலநிலை மாற்றத்தை எதிர்கொள்வதற்கான நடவடிக்கைகளை உடனடியாக நடைமுறைப்படுத்துமாறு கோரிக்கை விடுத்தனர்.

காலநிலைப் போராட்ட இயக்கத்தின் பேச்சாளர் ஒருவர், இந்த நெருக்கடிக்கு அரசியல், நிதி, சமூக மற்றும் பொருளாதார மட்டங்களில் மிகுந்த அவசரத்துடன் தீர்வு காணப்பட வேண்டும் என வலியுறுத்தினார்.

மாலை வேளையில் நாடாளுமன்ற சதுக்கத்தில் சிறுவர்கள் முதல் முதியவர்கள் வரை பல்வேறு வயதினரும் ஒன்றுகூடியிருந்தனர். பலர் தாங்களாகவே தயாரித்த பதாகைகளையும் ஏந்தியிருந்தனர்.

மக்கள் நிரம்பியிருந்த சதுக்கத்தில் உரைகள் இடம்பெற்றதைத் தொடர்ந்து, சைக்கிள் பேரணியும் கலந்துரையாடலும் ஏற்பாடு செய்யப்பட்டிருந்தன.

பாசலில் 4,000 பேர் பங்கேற்பு

பாசலில் நடைபெற்ற நாடளாவிய போராட்டத்தில் சுமார் 4,000 பேர் கலந்துகொண்டனர்.

2026ஆம் ஆண்டின் வரலாறு காணாத வெப்பமான கோடைகாலம் குறித்து கவனத்தை ஈர்க்கும் வகையில், அனுமதியுடன் நடைபெற்ற இந்தப் பேரணி ஷுட்சன்மாட் பூங்காவில் இருந்து நகர மையத்தை நோக்கி முன்னெடுக்கப்பட்டது.

போராட்டக்காரர்கள் பின்வரும் வாசகங்கள் அடங்கிய பதாகைகளை ஏந்தியிருந்தனர்:

“50°C வெப்பநிலையைக் கொண்ட கோடைகாலங்கள் வேண்டாம்!”
“சீரான இயற்கைச் சூழலே சிறந்த குளிரூட்டும் அமைப்பு!”
“எதிர்காலத்தைக் காப்பாற்றுங்கள் – எமக்கு இன்னொரு பூமி இல்லை!”

இளைஞர்கள் முதல் முதியவர்கள் வரை பல்வேறு தரப்பினரும் போராட்டத்தில் கலந்துகொண்டதாக கெய்ஸ்டோன்-SDA செய்தி நிறுவனத்தின் செய்தியாளர் தெரிவித்துள்ளார்.

100க்கும் மேற்பட்ட அமைப்புகள் ஆதரவு

“50°C வெப்பநிலையைக் கொண்ட கோடைகாலங்கள் வேண்டாம்!” என்ற கூட்டணியின் ஏற்பாட்டில் இந்த நாடளாவிய போராட்டங்கள் முன்னெடுக்கப்பட்டன.

காலநிலை கூட்டணி, காலநிலைப் போராட்ட இயக்கம், கிரீன்பீஸ், Pro Velo, VCS உள்ளிட்ட 100க்கும் மேற்பட்ட அமைப்புகளும் பல்வேறு இடதுசாரி மற்றும் பசுமைக் கட்சிகளும் இக்கூட்டணிக்கு ஆதரவளித்துள்ளன.

பேர்ன் மற்றும் பாசல் நகரங்களுக்கு மேலதிகமாக, சூரிச், லூசேர்ன், பெலின்சோனா உள்ளிட்ட பல நகரங்களிலும் போராட்டங்கள் நடைபெற்றன.

ஒட்டுமொத்தமாக, இந்த நாடளாவிய காலநிலைப் போராட்டங்களில் பல ஆயிரம் பேர் பங்கேற்றுள்ளனர்.