ஆட்சியாளர்கள் மாறலாம்; அடக்குமுறைக்கான பயங்கரவாத தடை போன்ற சட்டங்களை எதிர்த்த எம் கொள்கை மாறாது: மக்கள்

இன்று இலங்கையில் மக்கள் முன்னெடுத்த தீவிர போராட்டமானது, நடைமுறையிலுள்ள கொடூரமான பயங்கரவாதத் தடைச் சட்டம் (PTA), அதற்குப் பதிலாகக் கொண்டுவர முயற்சிக்கப்படும் பயங்கரவாதத்திலிருந்து அரசைப் பாதுகாக்கும் சட்டம் (PSTA) மற்றும் ஒழுங்கமைக்கப்பட்ட குற்றச் செயல்களைத் தடுப்பதற்காக முன்மொழியப்படும் சட்டம் ஆகிய அடக்குமுறைச் சட்டங்களுக்கு எதிரானதாகும்.

இந்தச் சட்டங்கள் தொடர்பில் நாம் தொடர்ச்சியாகக் கடுமையான விமர்சனங்களை முன்வைப்பதற்கு அடிநாதமாக விளங்கும் காரணம் ஒன்றே ஒன்றுதான்:

நீதித்துறையின் மேற்பார்வையையும் கட்டுப்பாட்டையும் பலவீனப்படுத்தி, பொலிஸாருக்கும் பாதுகாப்புத் தரப்பினருக்கும் அளவுக்கு மீறிய அதிகாரங்களை வழங்குவதன் மூலம், இச்சட்டங்கள் கோரமான மனித உரிமை மீறல்களுக்கு வழிவகுக்கும் பேராபத்தைக் கொண்டுள்ளன.

குறிப்பாக, எளிய சந்தேகத்தின் அடிப்படையில் ஒருவரைக் கைது செய்வதற்கும், பிணையின்றி நீண்டகாலம் தடுத்து வைப்பதற்கும் வழங்கப்படும் தன்னிச்சையான அதிகாரங்கள் தவறாகப் பயன்படுத்தப்படுவதை இட்டு நாம் எமது கடும் எதிர்ப்பைப் பதிவு செய்கிறோம்.
கடந்த கால வடுக்களும் கசப்பான உண்மைகளும்:
வரலாற்றைச் புரட்டிப் பார்த்தால், பயங்கரவாதத் தடைச் சட்டத்தின் கீழ் கைது செய்யப்பட்ட எத்தனையோ அப்பாவிகள், தங்களது மீதான குற்றங்கள் நிரூபிக்கப்படாமலேயே பல ஆண்டுகள் சிறைச்சாலைகளில் வாடியுள்ளனர். அவர்களின் இளமைக்காலம், குடும்ப வாழ்க்கை, எதிர்காலம் என அனைத்தும் பொசுக்கப்பட்டு சிதைக்கப்பட்டுள்ளன.
அன்று இக்கொடூரச் சட்டங்களை வீதிகளில் நின்று எதிர்த்தவர்கள், இன்று அதே நாற்காலிகளில் அமர்ந்துகொண்டு அவற்றுக்கு மாற்றாக அதேபோன்ற ஒடுக்குமுறை அதிகாரங்களை வழங்கக்கூடிய புதிய சட்டங்களைக் கொண்டுவரத் துடிக்கிறார்கள்.
அவர்கள் காலத்திற்கேற்பத் தங்களுடைய நிலைப்பாடுகளையும் இருக்கைகளையும் மாற்றிக்கொண்டிருக்கலாம். ஆனால், அரசாங்கங்களின் அதிகார மாற்றங்களுக்கு ஏற்ப எமது கொள்கைகளையும், மனித உரிமைகள் சார்ந்த எமது சமரசமற்ற நிலைப்பாடுகளையும் எம்மால் ஒருபோதும் மாற்றிக்கொள்ள முடியாது!

அரசாங்கத்திற்குக் கொடுக்கப்பட்ட நேரடி எச்சரிக்கை நாம் எதிர்ப்பது ஒரு குறிப்பிட்ட அரசாங்கத்தை மட்டுமல்ல; மாறாக, எந்தவொரு ஆட்சியின் கீழும் தொடரத் துடிக்கும் அரச அடக்குமுறையைத்தான்.

இன்று நாம் நடத்திய வீரியமான போராட்டத்தின் ஊடாக அரசாங்கத்திற்கு மிகத் தெளிவானதொரு செய்தியைச் சொல்லியிருக்கின்றோம்:

“நீங்கள் என்னதான் செய்தாலும் அமைதியாகப் பார்த்துக்கொண்டிருக்கும் ஊமைக்கூட்டமாக நாம் ஒருபோதும் இருக்கப்போவதில்லை!”

ஆட்சிகள் மாறலாம்; ஆட்சியாளர்களின் கவசங்களும் நிலைப்பாடுகளும் மாறலாம். ஆனால், மக்களின் அடிப்படை உரிமைகளுக்காகவும் நீதிக்காகவும் நாம் முன்னெடுக்கும் போராட்டங்கள் எந்தக் காலத்திலும் அதிகாரத்திற்கு ஏற்ப மாறப் போவதில்லை.

அன்று எதிர்த்தோம்! இன்றும் எதிர்க்கின்றோம்! நாளையும் எதிர்ப்போம்!

#SayNoToPTA #HumanRights #TamilMedia #SwissTamil #StopRepression #FreeSpeech #JusticeForVictims #HumanRightsViolations #DemocraticRights #AntiTerrorismAct #PeoplePower #TamilNews #VoiceForJustice #StandUpForRights