சுவிசின் ஆர்கவ் மாநிலத்தில் (Aargau) 11 ஆண்டுகளுக்கு முன் கிடைத்த ரோமானிய நாணயப் புதையலைப் பற்றிய புத்தகம் இப்போது வெளியாகியுள்ளது.
2015 கோடையில் ஃப்ரிக்டால் (Fricktal) பகுதியில் ஒரு விவசாயி தன் செர்ரி தோட்டத்தில் சில பழைய நாணயங்களைக் கண்டார். அவை ஒரு எலிப் புற்றுக்குள் இருந்தன. அவர் உடனே மாநிலத் தொல்லியல் துறைக்குச் சொன்னார். அவர்கள் மெட்டல் டிடெக்டர் வைத்துத் தேடினார்கள். மொத்தம் 4130 ரோமானிய செப்பு நாணயங்கள் கிடைத்தன.
சுவிசில் கிடைத்த மூன்றாம் நூற்றாண்டு நாணயப் புதையல்களில் இதுவே மிகப்பெரியது. டிசினோவில் (Ticino) கிடைத்த ஒன்று மட்டும் இதைவிடப் பெரியது. நாணயங்கள் மிகவும் சேதமடைந்திருந்தன. அதனால் ஆய்வகத்தில் சுத்தம் செய்து, ஒவ்வொன்றையும் படம் எடுத்து ஆராய பத்து ஆண்டுகளுக்கு மேல் ஆனது.
அந்தக் காலத்தில் ரோமானியப் பேரரசில் பணமுறை மாறியது. புதிய பணத்தை நம்பாத உரிமையாளர், பழைய, மதிப்பு கூடிய நாணயங்களைத் தேர்ந்தெடுத்து மண்ணில் புதைத்திருக்கலாம் என்று மாநிலத் தொல்லியல் துறைத் தலைவர் தாமஸ் டொப்லர் (Thomas Doppler) சொல்கிறார். இந்த நாணயங்களின் மதிப்பு சுமார் 10 தங்க நாணயங்களுக்குச் சமம். ஒரே ஒரு தங்க நாணயத்தில் பல வாரங்கள், சில சமயம் மாதங்கள் நன்றாக வாழ முடிந்தது.
புதையலை யார் புதைத்தார் என்று தெரியவில்லை. ஏன் அதை எடுக்கவே இல்லை என்பதும் தெரியவில்லை. ஆனால் அருகில் மக்கள் வாழ்ந்த கட்டடத்தின் எச்சங்கள் கிடைத்துள்ளன. அந்த இடம் ஆகுஸ்தா ரவுரிகா (Augusta Raurica) நகரையும் விண்டோனிசா (Vindonissa) நகரையும் இணைத்த ரோமானியச் சாலைக்கு அருகில் இருந்தது.
மூலம்: SRF
புகைப்படம்: Peter Barrett Bryan / Unsplash
