சுவிட்சர்லாந்தில் அக்டோபர் மாதம் வழமைக்கு மாறாக அதிகரிக்கப்போகும் வெப்பமும் வறட்சியும்!

சுவிட்சர்லாந்தில் கடந்த அக்டோபர் மாதம் சராசரி வெப்பநிலை 8 டிகிரி செல்சியஸாகப் பதிவாகியுள்ளது. இது 1991 முதல் 2020 வரையிலான காலப்பகுதியின் சராசரியை விட 1.4 டிகிரி அதிகமாகும்.

எனினும், இந்த வெப்பநிலை வரலாற்று ரீதியான அதிகபட்ச வெப்பநிலையை எட்டவில்லை என சுவிட்சர்லாந்தின் வானிலை மற்றும் காலநிலை அலுவலகமான MeteoSwiss தெரிவித்துள்ளது.

1864ஆம் ஆண்டு முதல் பதிவுகள் மேற்கொள்ளப்பட்டு வரும் நிலையில், 2026 அக்டோபர் மாதம் இதுவரை பதிவான வெப்பமான அக்டோபர் மாதங்களில் 11ஆவது இடத்தில் உள்ளது.

இதற்கு முன்னர் அதிக வெப்பமான அக்டோபர் மாதமாக 2022ஆம் ஆண்டு பதிவாகியுள்ளது. அப்போது சராசரி வெப்பநிலை 10.4 டிகிரி செல்சியஸாகக் காணப்பட்டது.

அக்டோபரில் குறைந்த மழைப்பொழிவு

2026 அக்டோபர் மாதத்தில் மாத இறுதிக்கு சற்று முன்னர் வரை மழைப்பொழிவு சராசரியை விடக் குறைவாகவே காணப்பட்டது.

ஜூரா பிராந்தியம் முதல் பாசல் வரையிலான பகுதிகளில் அதிக மழை பெய்திருந்தது. அதேவேளை, கிராபுண்டன், வலே, ஆல்ப்ஸ் மலைத்தொடரின் தெற்குப் பகுதி மற்றும் எங்காடின் ஆகிய பிராந்தியங்களில் கணிசமான மழைப் பற்றாக்குறை பதிவாகியுள்ளது.

சூரிய ஒளி கிடைத்த நேரத்தைப் பொறுத்தவரையில், சுவிட்சர்லாந்தின் பல பகுதிகளில் அக்டோபர் மாதத்தில் 1991–2020 காலப்பகுதியின் சராசரியை எட்ட முடியவில்லை.

இதற்கு மாறாக, டிசினோ மற்றும் நாட்டின் மத்திய பகுதிகளில் சராசரியை விட அதிகமான மணிநேர சூரிய ஒளி பதிவாகியுள்ளது.

வழக்கத்தை விட முன்னதாக மாறிய இலையுதிர் கால நிறங்கள்

2026ஆம் ஆண்டின் கோடைக்காலத்தில் பதிவான வரலாற்று ரீதியான அதிக வெப்பம் மற்றும் வறட்சியைத் தொடர்ந்து, அக்டோபர் மாதத்தில் நிலவிய குளிர்ச்சியான வெப்பநிலை மற்றும் இடையிடையே பெய்த மழைக்கு தாவரங்கள் வெவ்வேறு விதமாக எதிர்வினையாற்றின.

வறட்சியின் தாக்கத்தால் சில பகுதிகளில் கோடைக்காலத்தின் இறுதிப்பகுதியிலேயே இலைகள் நிறம் மாறி உதிரத் தொடங்கின. எனினும், வழக்கமான இலையுதிர் கால நிறமாற்றம் எதிர்பார்த்ததை விட தாமதமாகவே ஆரம்பமானது.

பீச், ஹார்ன்பீம், லைம், ஹார்ஸ் செஸ்ட்நட், பிர்ச் மற்றும் பழ மரங்களில் இலைகள் வழக்கத்தை விட மூன்று முதல் நான்கு வாரங்கள் முன்னதாகவே நிறம் மாறியமை அவதானிக்கப்பட்டுள்ளது.

அக்டோபர் மாதத்தின் ஆரம்பத்தில் சில பகுதிகளில் தாவரங்கள் மீண்டும் வளரத் தொடங்கியமை, இரண்டாவது வசந்தகாலம் போன்ற தோற்றத்தை ஏற்படுத்தியது.

உதாரணமாக, சில ஆப்பிள் மற்றும் பேரிக்காய் மரங்களில் மீண்டும் புதிய இலைகள் தோன்றியதுடன், பூக்களும் மலர்ந்தன.

அதேவேளை, டெய்ஸி மற்றும் நாப்வீட் போன்ற வசந்தகாலத்தில் பூக்கும் தாவரங்களும் மீண்டும் பூக்கத் தொடங்கியுள்ளன.