தமிழர்களின் பூர்வீக நில அபகரிப்பும், பொய்களால் கட்டப்பட்ட விகாரையும்: குருந்தூர் மலையில் அரங்கேறும் தொடர்ச்சியான அத்துமீறல்கள்!
முல்லைத்தீவு மாவட்டத்தில் அமைந்துள்ள வரலாற்றுச் சிறப்புமிக்க குருந்தூர் மலை விவகாரம் என்பது, வெறும் வாதப்பிரதிவாதங்களுக்கு அப்பால், தமிழர்களின் பூர்வீகச் சொத்துக்களைப் பறித்து அங்கு திட்டமிடப்பட்டு அரங்கேற்றப்படும் வரலாற்றைத் திரிக்கும் செயலின் வெளிப்பாடாகும்.
வரலாற்று உண்மைகளும் தமிழர்களின் பூர்வீக அடையாளமும்:
குருந்தூர் மலையில் தமிழ்நாட்டின் மதுரை மற்றும் சோழர் காலப் பாரம்பரியத்தை ஒத்த பழைமையான சிவலிங்கம் மற்றும் தொன்மையான தமிழ் – இந்து வழிபாட்டுச் சின்னங்கள் காலம்காலமாக இருந்து வந்தன. இது தமிழர்களின் பூர்வீக வழிபாட்டுத் தலம் என்பதற்கான மறுக்க முடியாத சான்றாகும்.
தமிழர்களின் பூர்வீக நிலங்களை வலுக்கட்டயமாக அபகரித்து, அங்கு பொய்யான வரலாற்றைக் கட்டமைத்து விகாரம் கட்டப்பட்டுள்ளதுடன், அந்த நிலங்களின் மீது தமிழர்களுக்குள்ள உரிமையை முற்றிலுமாக மறுக்கும் வேலைகள் தொடர்கின்றன.
தற்போதைய நிகழ்வுகளும் ஆக்கிரமிப்பு நடவடிக்கைகளும்:
இந்நிலையில்தான், சமீபத்தில் வரலாற்றுச் சிறப்புமிக்க இந்தக் குருந்தூர் மலை நீதிமன்ற சட்டத்திற்கு முரணாக கட்டப்பட்டு வரும் விகாரையில் “ராஜா போஜன் புத்தர் பூஜை மற்றும் 8 வகையான சாதங்கள், 32 கறிகளுடன் கூடிய சங்கா தருமதானம்” எனும் பூசை நிகழ்வுகள் அரங்கேற்றப்பட்டுள்ளன.
வெலியோய சம்பத்நுவர தேசியப் பள்ளியின் அதிபர், ஆசிரியர்கள் மற்றும் பெற்றோர்களை முன்னிலைப்படுத்தி இதுபோன்ற நிகழ்வுகள் மூலம் இப்பகுதியின் பூர்வீகத் தமிழ் அடையாளங்களை திட்டமிட்டு மழுங்கடிக்கும் முயற்சிகள் நடந்து வருகின்றன.
மேலும், இந்த நில அபகரிப்புக்குத் துணைபோவதோடு, அதனைப் பாதுகாக்கும் பெயரில் அங்கு நிலைநின்றுள்ள மற்றும் இறந்த சிறிலங்கா ராணுவத்தினரை முன்னிலைப்படுத்தி அண்மையில் விசேட பூசைகளும் வழிபாடுகளும் நடத்தப்பட்டுள்ளமை, இப்பகுதியின் தமிழ் ஆன்மீக உரிமைகள் மற்றும் நில அபகரிப்பின் மீதான நேரடித் தாக்குதலாகும்.
தமிழ் மக்களின் வாக்குகளால் பாராளுமன்ற அரியாசனத்தை அலங்கரிக்கும் தமிழ் பாராளுமன்ற உறுப்பினர்கள் இவை போன்ற அபகரிப்புக்களுக்காகவேனும் ஒருமித்த குரலினை எழுப்ப வேண்டும் என்பது வாக்களித்த மக்களின் வேண்டுதலாக உள்ளது.
வரலாறு என்பது திரிக்கப்படலாம், ஆனால் உண்மையான தடயங்களும் மக்களின் நினைவுகளும் எக்காலத்திலும் அழியாது. குருந்தூர் மலையின் உண்மையான ஆன்மாவையும் தமிழர்களின் பூர்வீக உரிமையையும் மீட்டெடுப்பதற்கான குரல் எப்போதும் தொடரும்!
