திருகோணமலை மாவட்டத்தில் அமைந்துள்ள வரலாற்றுச் சிறப்புமிக்க கன்னியா வெந்நீர் ஊற்று, தமிழர்களுக்கும் குறிப்பாக இந்து மக்களுக்கும் மத, வரலாறு மற்றும் பண்பாட்டு முக்கியத்துவம் வாய்ந்த இடமாகக் கருதப்படுகிறது.
இப்பகுதியில் சிவன் ஆலயம், பிள்ளையார் ஆலயம் என்பன இருந்ததுடன், முன்னோர்களின் ஆத்ம சாந்திக்காக இறுதிக்கிரியைகள் மேற்கொள்ளப்படும் புனிதத் தலமாகவும் இது நீண்டகாலமாகப் பயன்படுத்தப்பட்டு வந்ததாக உள்ளூர் மக்கள் தெரிவிக்கின்றனர்.
இந்நிலையில், பிள்ளையார் ஆலயம் அமைந்திருந்ததாகக் கூறப்படும் இடத்தில் புத்த விகாரைக்கான அடிக்கல் நாட்டும் நிகழ்வு நாளை(22) நடைபெறவுள்ளதாக தகவல்கள் வெளியாகியுள்ளன.இந்த நிகழ்வில் அமைச்சர்கள் உள்ளிட்ட அரசின் முக்கிய பிரதிநிதிகள் பங்கேற்கவுள்ளதாகவும் தெரிவிக்கப்படுகிறது.
இந்த நடவடிக்கைகள் தொடர்பாக, கன்னியா பகுதியின் வரலாற்று மற்றும் தொல்லியல் அடையாளங்கள் திரிபுபடுத்தப்படுகின்றன என்றும், தமிழர்களின் பாரம்பரிய மத மற்றும் பண்பாட்டு அடையாளங்கள் பாதிக்கப்படுகின்றன என்றும் சில சமூக அமைப்புகளும் உள்ளூர் மக்களும் கவலை வெளியிட்டு வருகின்றனர்.
அதேவேளை, இந்தக் குற்றச்சாட்டுகள் தொடர்பாக அரசாங்கம் அல்லது சம்பந்தப்பட்ட அதிகாரிகளின் உத்தியோகபூர்வ நிலைப்பாடு இதுவரை வெளிவரவில்லை. தமிழ் பிரதிநிதிகளாக உள்ள அமைச்சரும், நாடாளுமன்ற உறுப்பினர்களும் இந்த விவகாரத்தில் தங்களது நிலைப்பாட்டை வெளிப்படுத்த வேண்டும் எனவும்,
கன்னியாவின் வரலாற்று மற்றும் பண்பாட்டு மரபைப் பாதுகாப்பதற்கான நடவடிக்கைகள் மேற்கொள்ளப்பட வேண்டும் எனவும் பலர் வலியுறுத்துகின்றனர். மேலும், கன்னியா போன்ற வரலாற்று முக்கியத்துவம் வாய்ந்த இடங்கள் தொடர்பான எந்தவொரு அபிவிருத்தி அல்லது கட்டுமான நடவடிக்கைகளும் அனைத்து மத, இன சமூகங்களின் உணர்வுகளையும் கருத்தில் கொண்டு, வெளிப்படையான கலந்துரையாடல் மற்றும் சட்ட நடைமுறைகளின் அடிப்படையில் முன்னெடுக்கப்பட வேண்டும் என்பதே பொதுமக்களின் எதிர்பார்ப்பாக உள்ளது.
