ஏப்ரல் 21, 2019 அன்று உயிர்த்த ஞாயிறு பயங்கரவாதத் தாக்குதலைத் தொடர்ந்து தடை விதிக்கப்பட்ட 11 இஸ்லாமிய அமைப்புகளில் ஐந்து அமைப்புகளின் தடையை நிபந்தனையுடன் நீக்க அரசாங்கம் முடிவு செய்துள்ளது என ஆங்கில செய்தித்தாள் ஒன்று செய்தி வெளியிட்டுள்ளது.
புலனாய்வு மற்றும் புலனாய்வு அமைப்புகளின் நிபுணர்கள் அடங்கிய குழு அளித்த பரிந்துரைகளின்படி, இந்தக் குழுக்களின் பிரதிநிதிகள் மற்றும் அரசாங்க அதிகாரிகளுக்கு இடையேயான பேச்சுவார்த்தைகளைத் தொடர்ந்து ஐந்து அமைப்புகளின் மீதான தடை நீக்கப்படுகிறது.
அதன்படி, ஜம்இய்யதுல் அன்ஸாரி சுன்னத்துல் முகமதியா (JASM), ஸ்ரீலங்கா தவ்ஹீத் ஜமாத் (SLTJ), அகில இலங்கை தவ்ஹீத் ஜமாத் (ACTJ), சிலோன் தவ்ஹீத் ஜமாத்(CTJ) மற்றும் ஐக்கிய தவ்ஹீத் ஜமாஅத் (UTJ). ஆகிய இஸ்லாமிய அமைப்புகளின் மீதான தடை கடுமையான நிபந்தனைகளுக்கு உட்பட்டு நீக்கப்படும் என அந்த செய்தியில் மேலும் தெரிவிக்கப்பட்டுள்ளது
முன்னாள் ஜனாதிபதி கோட்டாபய ராஜபக்ஷ, பயங்கரவாதத் தடைச் சட்டத்தின் கீழ் இந்த ஐந்து அமைப்புக்கள் உட்பட 11 அமைப்புகளையும் தடை செய்து வர்த்தமானி அறிவித்தலை 2021 ஏப்ரல் மாதம் வெளியிட்டார்.
புலனாய்வு அமைப்புகளுடன் நடத்திய பேச்சுவார்த்தையின் போது, இந்த அமைப்புகளின் பிரதிநிதிகள் தங்கள் உறுப்பினர்களின் செயல்களுக்கு பொறுப்பேற்பதாக உறுதியளித்ததாக மூத்த அரசாங்க அதிகாரி ஒருவர் தெரிவித்துள்ளார்.
இருந்தபோதிலும், தடை நீக்கப்பட்ட பிறகும், இந்த அமைப்புகளின் செயல்பாடுகள், அவற்றின் நிதி மற்றும் கல்வித் திட்டங்கள் ஆகியவற்றை அதிகாரிகள் உன்னிப்பாகக் கண்காணிக்க வேண்டும் என்று நிபுணர் குழு பரிந்துரைத்துள்ளது. தேசிய பாதுகாப்பிற்கு பாதகமான செயற்பாடுகளில் ஈடுபடுவதாக ஏதேனும் தடயங்கள் இருப்பின், தடையை மீள அமுல்படுத்த வேண்டும் எனவும் குழு வலியுறுத்தியுள்ளது என அந்த செய்தியில் மேலும் தெரிவிக்கப்பட்டுள்ளது.
