‘மாற்று பாலின சிகிச்சை’ (Conversion Therapy) எனப்படும் நடைமுறைகளுக்கு எதிராக நாடு முழுவதும் ஒரே மாதிரியான சட்டம் கொண்டுவருவது பொருத்தமானது என சுவிட்சர்லாந்து அரசு தெரிவித்துள்ளது.
தற்போது ஒவ்வொரு மண்டலத்திலும் வெவ்வேறு விதமான விதிமுறைகள் இருப்பதால், இந்த நடைமுறைகளுக்கு எதிராக மத்திய அரசின் (Federal) மட்டத்தில் ஒரே சட்டத்தை உருவாக்குவது குறித்து பரிசீலிக்க வேண்டிய நிலை உள்ளது என அரசு கூறியுள்ளது.
ஏற்கனவே நடைமுறையில் உள்ள சில தேசிய அளவிலான சட்ட விதிமுறைகளுக்கு மேலதிகமாக, பல மண்டலங்கள் தங்களது சொந்த நிர்வாக அல்லது குற்றவியல் சட்ட நடவடிக்கைகளை அறிமுகப்படுத்தியுள்ளன. சில மண்டலங்கள் இதற்கான புதிய சட்ட முன்மொழிவுகளையும் ஆரம்பித்துள்ளன என்று புதன்கிழமை வெளியிடப்பட்ட அரசின் அறிக்கையில் குறிப்பிடப்பட்டுள்ளது.
மாற்று சிகிச்சைகள் எவ்வளவு பரவலாக உள்ளன?
கிடைக்கக்கூடிய தரவுகள் குறைவாக இருப்பதால், சுவிட்சர்லாந்தில் மாற்று சிகிச்சைகள் எந்த அளவுக்கு பரவலாக உள்ளன என்பதைத் துல்லியமாக கணக்கிட முடியவில்லை என அரசு தெரிவித்துள்ளது.
தனிநபரின் நிலைமை மற்றும் மேற்கொள்ளப்படும் நடைமுறையைப் பொறுத்து, இத்தகைய சிகிச்சைகள்:
- கடுமையான உளவியல் பாதிப்பை
- பதற்றம் மற்றும் மனச்சோர்வை
- தன்னம்பிக்கை மற்றும் சுயமதிப்பைக் குறைப்பதை
- சமூக உறவுகளில் பாதிப்பை
ஏற்படுத்தக்கூடும் என தெரிவிக்கப்பட்டுள்ளது.
மாற்று சிகிச்சை என்றால் என்ன?
லெஸ்பியன், கே, இருபாலினத்தவர் அல்லது திருநங்கை (LGBT) நபர்களின் பாலியல் நோக்குநிலையை மாற்றுவதை நோக்கமாகக் கொண்ட நடைமுறைகளே ‘Conversion Therapy’ அல்லது ‘மாற்று சிகிச்சைகள்’ எனப்படுகின்றன.
இத்தகைய நடைமுறைகளை சுவிஸ் அரசு தெளிவாக நிராகரிப்பதுடன், கண்டனமும் தெரிவித்துள்ளது.
தற்போது சில மண்டலங்கள் தனித்தனியாக நடவடிக்கை எடுத்து வரும் நிலையில், நாடு முழுவதும் ஒரே மாதிரியான சட்டத்தை உருவாக்குவதற்கான சாத்தியக்கூறுகளை சுவிஸ் அரசு ஆதரிக்கிறது.
