இந்தியப் பிரதமர் நரேந்திர மோடியும் தமிழக முதலமைச்சர் விஜய்யும் இணைந்து, சென்னை மெட்ரோ ரயில் திட்டத்தின் இரண்டாம் கட்டத்தில் பூந்தமல்லி – வடபழனி இடையிலான புதிய பாதையைத் திறந்து வைத்துள்ளனர்.
இதனைத் தொடர்ந்து, இரு தலைவர்களும் புதிதாகத் திறக்கப்பட்ட மெட்ரோ ரயிலில் ஒன்றாகப் பயணித்தனர். பயணத்தின்போது பயணிகளுடனும் வளர்ந்து வரும் புத்தாக்க நிறுவனங்களின் பிரதிநிதிகளுடனும் அவர்கள் கலந்துரையாடினர்.
சென்னையின் வேகமாக வளர்ந்து வரும் மேற்குப் புறநகர்ப் பகுதிகளையும் நகரின் மையப் பகுதிகளையும் இணைக்கும் இந்தப் புதிய பாதை, பயணிகளுக்கு விரைவான மற்றும் வசதியான போக்குவரத்து வசதியை வழங்கும் என எதிர்பார்க்கப்படுகிறது.
3.7 கிலோமீற்றர் இரட்டை அடுக்கு வழித்தடம்
இந்தத் திட்டத்தின் முக்கிய அம்சமாக, 3.7 கிலோமீற்றர் நீளமுள்ள இரட்டை அடுக்கு போக்குவரத்து வழித்தடம் அமைக்கப்பட்டுள்ளது. நகர்ப்புறங்களில் நிலப்பரப்பு குறைவாக உள்ள சூழலில், போக்குவரத்துக் கட்டமைப்புகளை ஒரே வழித்தடத்தில் அமைக்கும் வகையில் இது வடிவமைக்கப்பட்டுள்ளது.
புதிய மெட்ரோ பாதை திறப்பு குறித்து சமூக ஊடகங்களில் பதிவிட்ட பிரதமர் மோடி, அன்றாடப் பயணிகளுக்கு இந்தப் பாதை வழங்கும் நன்மைகளையும் சென்னையின் விரிவடைந்து வரும் போக்குவரத்து வலையமைப்பையும் சுட்டிக்காட்டினார்.
மெட்ரோ ரயில் பயணத்தின்போது சந்தித்த புத்தாக்க நிறுவனப் பிரதிநிதிகளின் உற்சாகத்தையும் அவர் பாராட்டினார்.
ரூ.4,900 கோடி செலவில் 11 நிலையங்கள்
சுமார் 15 கிலோமீற்றர் நீளமுள்ள உயர்மட்ட மெட்ரோ பாதை, இந்திய ரூபாய் 4,900 கோடி செலவில் அமைக்கப்பட்டுள்ளது. இதில் 11 ரயில் நிலையங்கள் உள்ளடங்குகின்றன. இது சென்னை மெட்ரோ இரண்டாம் கட்டத்தின் நான்காவது வழித்தடத்தின் ஒரு பகுதியாகும்.
நகரம் முழுவதும் பொதுப் போக்குவரத்து இணைப்புகளை மேம்படுத்துவதும், பயணிகளின் போக்குவரத்துச் சிரமங்களைக் குறைப்பதும் சென்னை மெட்ரோ இரண்டாம் கட்ட விரிவாக்கத்தின் முக்கிய நோக்கங்களாகும்.
இந்தப் புதிய பாதையில் ஞாயிற்றுக்கிழமை பிற்பகல் முதல் பயணிகள் சேவை ஆரம்பிக்கப்பட்டுள்ளது. ஒக்டோபர் 12ஆம் திகதி திங்கட்கிழமை முதல் தினமும் காலை 7 மணி முதல் இரவு 9 மணி வரை ரயில்கள் இயக்கப்படவுள்ளன.
